Kanadaja përzgjedhet si selia e bankës së propozuar të NATO-s për mbrojtje dhe rezistencë

Kanadaja është përzgjedhur si selia e një institucioni të ri financiar të lidhur me NATO-n, i krijuar për të ulur koston e huamarrjes për vendet anëtare. Banka e propozuar, e quajtur Defense, Security and Resilience Bank (DSRB), synon t9u ndihmojë shteteve anëtare dhe partnerëve të përmbushin angazhimet për shpenzime të mbrojtjes duke bashkuar fuqinë e tyre kredituese. Vendimi u mor pas negociatave të organizuara nga Kanadaja, ku morën pjesë rreth 20 anëtarë themelues.

Një zyrtar i qeverisë, i cili foli në kushte anonimiteti sepse nuk ishte i autorizuar të fliste para njoftimit zyrtar, tha se për momentin nuk është caktuar qyteti i selisë dhe se detajet e tjera do të bëhen publike më vonë, raporton Associated Press. Kryeministri i Ontarios, Doug Ford, në një postim në rrjete sociale sugjeroi Toronto-n si vend ideal për selinë, duke përmendur rolin e qytetit si qendër financiare dhe lidhshmërinë globale. Qeveria kanadeze ka njoftuar se do të përmbushë objektivin e mëparshëm të shpenzimeve ushtarake prej 2% dhe ka shprehur synimin për të arritur 5% të PBB-së deri në vitin 2035.

Vendimi për krijimin e DSRB vjen ndërsa aleatët, pas nisjes së pushtimit të plotë të Ukrainës nga Rusia më 24 shkurt 2022, kanë rritur ndjeshëm shpenzimet për forcat e armatosura, armët dhe municionet. Sipas Associated Press, pritet që emërimi zyrtar i selisë dhe detajet e mëtejshme rreth funksionimit të bankës të bëhen të ditura në njoftimet e ardhshme.