Kapet rreth 1 kg marihuanë në Pejë, arrestohen tre persona

Rreth një kilogram marihuanë është kapur nga Policia e Kosovës në Pejë, ndërsa tre persona janë arrestuar nën dyshimin për përfshirje në blerjen, shpërndarjen dhe shitjen e paautorizuar të narkotikëve, siç njofton Klan Kosova.

Sipas njoftimit zyrtar të Policisë së Kosovës, të dyshuarit janë dy shtetas kosovarë dhe një shtetase e Shqipërisë. Ata u ndaluan gjatë kontrollit të veturës me të cilën po udhëtonin, ku policia zbuloi dhe sekuestroi substancën e dyshuar narkotike të llojit marihuanë.

Gjatë operacionit, përveç drogës, policia sekuestroi si prova materiale edhe një sasi parash të gatshme, tre telefona celularë, dy thika si dhe veturën e përdorur nga të dyshuarit.

Me vendim të prokurorit kompetent, të tre personat e arrestuar janë dërguar në mbajtje, ndërsa hetimet për rastin pritet të vazhdojnë.

Të dyshuarit prezumohen të pafajshëm derisa fajësia e tyre të provohet me vendim të formës së prerë nga gjykata.