Kërkohet një i dyshuar i armatosur pas të shtënave në Taylor, viktima jashtë rrezikut për jetën

Policia e Taylor është në kërkim të një personi të interesit që dyshohet se lidhet me një incident me armë zjarri të ndodhur mbrëmjen e së dielës në kompleksin e apartamenteve “The Ponds”.

Personi i kërkuar është identifikuar si Joshua Malik Obie, 25 vjeç, i cili konsiderohet i armatosur dhe i rrezikshëm. Oficerët u thirrën në vendngjarje pak para orës 21:00, pas raportimeve për një burrë të plagosur me armë zjarri në zonën e Eureka Road, pranë Inkster Road.

Në mbërritje, policia gjeti viktimën me një plagë në gjoks dhe e transportoi menjëherë në spital, ku ndodhet në gjendje të qëndrueshme. I dyshuari ishte larguar nga vendi i ngjarjes përpara mbërritjes së forcave të rendit.

Autoritetet bëjnë të ditur se Obie frekuenton shpesh zonën e Detroit. Ai përshkruhet si afro-amerikan, me flokë të zinj dhe rreth 1.80 metra i gjatë.

Qytetarët që kanë informacion mund të kontaktojnë policinë e Taylor në numrin 734-287-6611.

Ngjarja e së dielës është rasti i dytë i të shtënave në të njëjtin kompleks gjatë fundjavës. Incidenti i parë ndodhi rreth orës 01:40 të mëngjesit të së shtunës, kur një i mitur u gjet i plagosur në të dyja këmbët. Hetimet çuan në arrestimin e dy të miturve që njiheshin me viktimën, ndërsa dyshohet se një debat kishte çuar në të shtënat.

Të gjitha informacionet janë bërë publike nga policia e Taylor.