Kisha Ortodokse Shqiptare organizon festimin e Ditës së Shën Thomait

Komuniteti shqiptar në Michigan pritet të mblidhet sërish për një nga festat më të dashura shpirtërore dhe tradicionale. Kisha Ortodokse Shqiptare Shën Thomai organizon këtë vit festimin e Ditës së Shën Thomait, një aktivitet që bashkon besimin, kulturën dhe frymën komunitare.

Festimi do të zhvillohet të dielën, më 19 prill, menjëherë pas Liturgjisë Hyjnore në orën 12:00, në ambientet e kishës në adresën 29150 W 10 Mile Rd, Farmington Hills. Ky aktivitet tashmë është kthyer në një traditë të rëndësishme për shqiptarët e zonës, duke ofruar një mundësi për t’u takuar, për të ndarë vlera të përbashkëta dhe për të forcuar lidhjet brenda komunitetit.

Pjesëmarrësit do të kenë mundësinë të shijojnë një drekë të pasur tradicionale, ku nuk do të mungojnë specialitetet si qengji i pjekur, pula, orizi, penne me salcë marinara, salçiçet italiane me speca dhe qepë, si dhe perime të pjekura dhe sallatë. Organizatorët premtojnë një atmosferë festive dhe mikpritëse, ashtu siç e kërkon tradita shqiptare.

Atmosfera do të gjallërohet edhe më tej nga muzika live, ku do të performojnë Ermira Babaliu, Riku Lickollari dhe DJ Gentian Cekorja, duke sjellë këngë dhe ritme që pritet të krijojnë një ambient të ngrohtë dhe argëtues për të gjitha moshat.

Çmimet e biletave janë 65 dollarë për të rriturit dhe 25 dollarë për fëmijët nën 12 vjeç. Duke qenë se vendet janë të kufizuara, organizatorët u bëjnë thirrje të interesuarve të konfirmojnë pjesëmarrjen sa më parë duke kontaktuar Aleksander Kume në numrin (586) 495-6217.

Kjo festë nuk është vetëm një aktivitet social, por edhe një mënyrë për të ruajtur dhe përcjellë traditat shqiptare brez pas brezi, duke e bërë komunitetin më të bashkuar dhe më të fortë në diasporë.