“Klienti im s’ka prekur para publike”, avokati Maks Haxhia: Duam të njihemi me dosjen e Ergys Agasit

Avokati i Ergys Agasit, Maks Haxhia, zhvilloi këtë të enjte, më 27 gusht, një takim në qeli me klientin e tij.

Pas takimit, Haxhia foli për mediat, duke deklaruar se pala mbrojtëse kërkon të njihet me dosjen e hetimit, që të mund të paraqesë pretendimet e saj.

“Zhvillova një takim sot me klientin tim Ergys Agasi. Kuptohet që ne si palë mbrojtëse duam që të njihemi me dosjen. Duam të njihemi me dosjen, se pa e pasur atë, nuk kemi si të ngremë edhe pretendimet”, u shpreh ai.

Sipas avokatit, Agasi pretendon se nuk ka asnjë përgjegjësi juridike lidhur me çështjen për të cilën po hetohet.

“I mbrojturi prej meje Agasi, pretendon se është jashtë çdo ngarkese juridike. Ai pretendon se nuk ka prekur financat publike, sepse nuk ka pasur funksion të tillë, që të financojë financën publike. Nuk ka marrë pjesë as nëpër tendera. Media e ka zmadhuar problemin”, tha Haxhia.

I pyetur se nëse Agasi pretendon pafajësinë, përse nuk është dorëzuar më herët, Haxhia pretendoi se nuk funksionon siç duhet mënyra e ndjekjes së procedurave penale në Shqipëri.

“Problemi është që në Shqipëri të fusin në burg, pastaj nisin me akuzat. E di atë historinë, ta presin këmbën e pastaj ta numërojnë që nëse ke apo jo dy këmbë. Duhet të jetë e kundërta, duhet të bëjnë hetime, të gjejnë prova dhe më pas të kërkohet masë e përshtatshme”, u shpreh avokati Haxhia.

Seanca gjyqësore për konfirmimin e masës së sigurisë “arrest me burg” për Agasin pritet të mbahet në ditët në vijim.