Kurti: Gjatë vitit 2025, në Kosovë u kthyen 171 mjekë

Kryeministri i Kosovës, Albin Kurti, mori pjesë të shtunën (7 nëntor 2026) në hapjen e edicionit të katërt të “Swiss Medical School” dhe vlerësoi bashkëpunimin ndërmjet mjekëve shqiptarë në diasporë dhe profesionistëve shëndetësorë në Kosovë, siç njofton RTK-ja.

Sipas Kurtit, gjatë vitit 2024 në Kosovë u kthyen 105 mjekë që kishin studiuar ose punuar jashtë, ndërsa gjatë vitit 2025 numri i të kthyerëve arriti në 171 — zhvillim që ai e cilësoi si dëshmi se profesionistët shëndetësorë mund t’i shërbejnë atdheut pa e ndjerë mërgimin si domosdoshmëri, por si mundësi.

Kurti përshëndeti presidentin e Lidhjes së Mjekëve Shqiptarë në Zvicër, Prof. Dr. Naim Shoshi, dhe ministrin e Shëndetësisë, Dr. Arben Vitia, duke theksuar se profesionistët e diasporës ndihmojnë që sistemi shëndetësor i Kosovës të zhvillohet sipas standardeve evropiane dhe zvicerane.

Kurti përmendi edhe investimet në klinikat e QKUK-së: mbi 5.5 milionë euro në Klinikën e Gjinekologjisë, rreth 1.45 milionë euro në Kardiologjinë Invazive dhe mbi tre milionë euro në Neurokirurgji dhe Kirurgji Vaskulare; buxheti për Listën e Barnave Esenciale është rritur nga 35 milionë euro në vitin 2019 në 64 milionë euro, ndërsa ai për barnat e pacientëve onkologjikë nga 8 në 22 milionë euro.