Lindy Ruff firmos kontratë dyvjeçare dhe mbetet trajner i Buffalo Sabres

Lindy Ruff ka nënshkruar një kontratë dyvjeçare dhe do të qëndrojë trajner i Buffalo Sabres deri në përfundim të sezonit 2027-28. 66-vjeçari, i cili kishte kontratën në skadencë, do të drejtojë skuadrën edhe për dy sezonet e ardhshme.

Në sezonin e tij të dytë gjatë rikthimit te Sabres, Ruff drejtoi një prej rikthimeve më të shquara në histori të ligës dhe u përzgjodh si finalist për Çmimin Jack Adams si trajneri i vitit, sipas nhl. Buffalo ishte 11-13-4 dhe i fundit në Konferencën Lindore më 5 dhjetor, por më pas përfundoi sezonin me një seri 39-10-5 për të fituar Divizionin Atlantic me bilancin 50-23-9—titulli i parë i divizionit që nga 2009-10—dhe ndërpreu periudhën më të gjatë pa paraqitje në plej-of në historinë e ligës (që nga 2010-11). Në raundin e dytë të play-off, Sabres u eleminuan nga Montreal Canadiens pas shtatë ndeshjesh.

Skuadra shënoi përmirësime të dukshme në aspektin ofensiv dhe defensiv: këtë sezon renditet e pesta për gola të shënuar për ndeshje (3.45) dhe e përbashkët e 10-ta për gola të pranuar (2.93), pas një përfundimi në vendin e 20-të sezonin e kaluar me mesatarisht 3.50 gola të pësuar. Pas sezonit, Ruff tha se synimi i tij ishte që lojtarët të gëzonin të qenit pjesë e Sabres dhe vuri në dukje se ekipi bëri qytetin krenar, edhe pse ishte i zhgënjyer për rezultatin në play-off.

Ruff është trajneri me më shumë fitore në historinë e Sabres, me shifrat 657-494-100 dhe 78 barazime gjatë periudhave të tij në klub, përfshirë mandatin e parë nga 1997 deri në 2013. Në karrierën si trajner ai kap 950-741-169 me 78 barazime në 1,938 ndeshje të rregullta, duke drejtuar Buffalo, Dallas Stars dhe New Jersey Devils. Si lojtar, Ruff luajti 12 sezone në NHL, dhjetë prej të cilave me Buffalo (1979–89), dhe shërbeu si kapiten për tre sezone (1986–89), raporton nhl.