Llapi i jep fund serisë prej shtatë ndeshjesh pa fitore
Llapi i ka dhënë fund serisë prej shtatë ndeshjesh pa fitore, siç njofton Futbolli.info, pasi triumfoi 1:0 në udhëtim ndaj Dukagjinit në Klinë, në ndeshjen e vlefshme për javën e 13-të të Albi Mall Superligës.
Golin e vetëm të takimit e shënoi Rilind Hetemi në minutën e 89-të, duke i siguruar skuadrës nga Podujeva tri pikët e plota në fundin e ndeshjes.
Kjo ishte fitorja e parë e Llapit pas rreth dy muajsh dhe vetëm e dyta e këtij sezoni, krahas dy barazimeve dhe nëntë humbjeve, një bilanc që tregon vështirësitë e skuadrës gjatë kësaj periudhe.
Me këtë fitore, Llapi arrin në 8 pikë, por mbetet në vendin e parafundit në tabelë, ndërsa suksesi në Klinë i jep asaj një shtysë të rëndësishme për vazhdimësinë e kampionatit.
Nga ana tjetër, Dukagjini pësoi humbjen e tretë të sezonit. Skuadra nga Klina ka regjistruar katër fitore dhe gjashtë barazime dhe me 18 pikë renditet në vendin e gjashtë.
