Lutfi Dalipi e ka zgjedhur Kosovën, të shtunën do të jetë në “Fadil Vokrri”
Mesfushori i talentuar Lutfi Dalipi ka vendosur ta përfaqësojë Kosovën në nivel ndërkombëtar, siç njofton Telegrafi në një shkrim ekskluziv. Vendimi i lojtarit tashmë është marrë dhe ai pritet të jetë prurja më e re e Dardanëve.
Dalipi ka qenë emri më i përfolur në Zvicër këtë edicion, duke u shndërruar në sensacionin e sezonit. Ai i befasoi të gjithë kur refuzoi ftesën e grupmoshave U21 të Zvicrës, duke e informuar Federatën Zvicerane se do të luajë për Kosovën ose Shqipërinë, një premtim që ia kishte dhënë gjyshit të tij.
Gazetari Lavdim Pireva, në podcastin “Arena e Yjeve”, prodhim i Telegrafit, ka zbuluar se lojtari nga Presheva do të jetë në Prishtinë të premten, ndërsa të shtunën do ta ndjekë nga afër në stadiumin “Fadil Vokrri” sfidën mes Kosovës dhe Izraelit, që zhvillohet nga ora 15:00 në kuadër të Ligës së Kombeve. “Këtë e them me 100 për qind bindje: në muajin mars, ai do të jetë lojtar i Kosovës”, ka deklaruar Pireva, duke shtuar se, përveç tri prurjeve të fundit, Enis Rexhepit, Bleon Kurtulusit dhe Lindrit Kamberit, afrimi i fundit i Kosovës është pikërisht Dalipi.
Forma e tij këtë sezon flet vetë: i huazuar te Vaduzi nga Young Boys, Dalipi ka shënuar pesë gola dhe ka dhënë nëntë asistime, ndërsa me 36 driblime të kompletuara është ndër më të dalluarit në Evropë në këtë aspekt. Sipas Pirevës, ai është në këtë moment ndoshta ndër lojtarët shqiptarë më në formë.
Që nga fillimi i sezonit, 20-vjeçari është përcjellë vazhdimisht si nga Federata e Futbollit e Kosovës (FFK), ashtu edhe nga Federata Shqiptare e Futbollit (FSHF). Të dy përzgjedhësit e kanë kontaktuar për t’i konfirmuar se e duan sa më parë në ekip, ndërsa përzgjedhësi i Shqipërisë, Maran, udhëtoi edhe në Zvicër bashkë me presidentin Armand Duka, ku u takuan fizikisht si me Dalipin, ashtu edhe me Samuel Krasniqin e Grasshoppers. Mirëpo, siç njofton Telegrafi, projekti i Kosovës i ka pëlqyer më shumë lojtarit dhe, pas disa ditësh bisedime me familjen, ai u ka kthyer përgjigje pozitive Dardanëve.
Kësisoj, Dalipi do të jetë në dispozicion të Kosovës që nga muaji mars, kur nisin zyrtarisht kualifikueset për Kampionatin Evropian Euro 2028. Ardhja e tij pritet të jetë një lëvizje e madhe për Dardanët, duke pasur parasysh cilësinë e lojtarit për të luajtur në disa pozicione në aspektin ofensiv.
Interesimi për të në Evropë është i madh, sidomos në Gjermani: sipas raportimeve të mediave zvicerane, klubet e Bundesligës, RB Leipzig, Hoffenheim dhe Eintracht Frankfurt, e kanë kontaktuar tashmë, ndërsa ai mbetet edhe në radarin e Fiorentinës e të Betisit. Dëshira e lojtarit aktualisht është ta përfundojë këtë edicion te Vaduzi, para se të kthehet te Young Boys dhe më pas të vendosë për të ardhmen e tij.
