Mbrëmje festive për 115-vjetorin e Kryengritjes së Malësisë

Një mbrëmje festive me karakter historik dhe kulturor do të mbledhë shqiptarët e Michigan më 11 prill 2026, në një aktivitet të organizuar nga Komuniteti Katolik Shqiptar i Shën Palit, në përkujtim të 115-vjetorit të Kryengritjes së Malësisë së vitit 1911.

Aktiviteti do të nisë në orën 7:00 të mbrëmjes dhe pritet të sjellë një kombinim të fjalëve përkujtimore, programit artistik dhe një darke tradicionale shqiptare. I ftuar special i kësaj mbrëmjeje do të jetë ambasadori Zef Mazi, i cili do të udhëtojë nga Vjena për të mbajtur fjalën e rastit.

Në pjesën artistike do të performojë këngëtari i muzikës së Malësisë, Albert Abedini, i shoqëruar nga muzikanti Erind Emiri, duke sjellë në skenë repertor tradicional shqiptar.

Organizatorët kanë parashikuar edhe një darkë me gatime të traditës, e përfshirë në çmimin e biletës, i cili është 100 dollarë për të rritur dhe 50 dollarë për fëmijët nën 12 vjeç.

Për pjesëmarrje dhe rezervime, të interesuarit mund të kontaktojnë përfaqësuesit e komunitetit përmes numrave të publikuar nga organizatorët.