Michigan planifikon të heqë mbi 2.1 milion regjistrime të vjetruara të votuesve deri në vitin 2029
Sekretarja e Shtetit Jocelyn Benson thotë se procesi synon pastrimin e listave zgjedhore pa cenuar aksesin e votuesve
LANSING, MI – Zyra e Sekretares së Shtetit në Michigan ka identifikuar më shumë se 2.1 milion regjistrime votuesish të konsideruara si të vjetruara që nga viti 2019, një pjesë e të cilave pritet të hiqet nga listat zgjedhore deri në vitin 2029.
Sipas njoftimit zyrtar, rreth 1.5 milion regjistrime janë fshirë tashmë gjatë gjashtë viteve të fundit nga sistemi shtetëror i votuesve. Për herë të parë, procesi do të përfshijë edhe mbi 180,000 regjistrime të cilësuara si “të fjetura”, që i përkasin personave që nuk kanë votuar në asnjë zgjedhje për të paktën 20 vite.
Ky zhvillim vjen pas miratimit të një rregulli të ri administrativ nga Byroja e Zgjedhjeve, i cili synon të adresojë një numër të madh regjistrimesh të pasakta apo shumë të vjetra. Autoritetet theksojnë se shumë prej këtyre votuesve mund të jenë zhvendosur, ose të kenë ndërruar jetë, ndërsa një pjesë e vogël mund të rikthehet për të votuar pas shumë vitesh.
Procesi i fshirjes nuk është i menjëhershëm. Çdo individ që identifikohet do të marrë fillimisht një njoftim zyrtar. Pas kësaj, ai ka dy cikle zgjedhore federale për të konfirmuar statusin e tij ose për të marrë pjesë në votime. Nëse nuk ndërmerr asnjë veprim, regjistrimi i tij do të hiqet nga listat.
Aktualisht, afro 600,000 persona janë kaluar në status “joaktiv”, çka do të thotë se regjistrimet e tyre janë në pritje për t’u anuluar në vitet 2027 dhe 2029. Sipas zyrës së Benson, kjo përfaqëson rreth 500,000 më shumë fshirje sesa në administratat e mëparshme.
Njoftimi vjen në një periudhë politike të ndjeshme, pasi Benson është kandidate në garën për guvernatore në vitin 2026. Procesi i menaxhimit të listave zgjedhore ka qenë objekt kritikash nga republikanët, të cilët kanë ngritur shqetësime për saktësinë e tyre dhe kanë kërkuar hetime shtesë.
Megjithatë, auditimet e kryera nga zyrtarë zgjedhorë nga të dyja partitë nuk kanë evidentuar probleme të mëdha në proceset zgjedhore të shtetit.
Zyrtarët theksojnë se, paralelisht me pastrimin e listave, më shumë se 2.4 milion votues të rinj janë regjistruar që nga viti 2018. Ata argumentojnë se qëllimi është ruajtja e një ekuilibri mes aksesit të gjerë në votim dhe saktësisë së regjistrave.
Sipas ligjit në Michigan, çdo votues që hiqet nga listat ka të drejtë të riregjistrohet në çdo kohë, madje edhe në ditën e zgjedhjeve.
