Ndezi zjarr dhe rrezikoi një fshat të tërë, arrestohet 25-vjeçari në Tërbaç
Një 25-vjeçar është arrestuar nga Policia e Himarës sot në 30 gusht, pasi dyshohet se ka ndezur zjarr në fshatin Tërbaç.
Flakët nisën në vendin e quajtur “Lugu i Thatë” më 26 gusht dhe u përhapën me shpejtësi në territorin e fshatit Vranisht. Zjarri përfshiu sipërfaqe të mëdha toke të mbjella, si dhe bimësi të egër e pyjore. Përhapja e flakëve rrezikoi zonën dhe shkaktoi dëme të konsiderueshme në sipërfaqet e prekura.
Pas marrjes së njoftimit, shërbimet e Policisë dhe forcat zjarrfikëse ndërhynë për të vënë situatën nën kontroll. Ndërkohë, policia nisi hetimet për përcaktimin e shkakut dhe identifikimin e personit përgjegjës.
Pas veprimeve hetimore dhe administrimit të provave, u identifikua si i dyshuar 25-vjeçari A. B., banues në Tërbaç. Ai u arrestua dhe materialet procedurale iu referuan Prokurorisë së Vlorës për veprën penale “Shkatërrimi me zjarr i pyjeve dhe i mjedisit pyjor”.
Njoftimi i policisë
Himarë/Ndezi zjarr në fshatin Tërbaç, i cili u përhap deri në territorin e fshatit Vranisht, identifikohet dhe arrestohet autori i dyshuar
Shërbimet e Komisariatit të Policisë Himarë, menjëherë pas njoftimit se më datë 26.08.2026, në vendin e quajtur “Lugu i Thatë”, në fshatin Tërbaç, kishte rënë zjarr dhe po digjeshin sipërfaqe toke, kanë shkuar menjëherë në vendngjarje.
Krahas mbështetjes së forcave zjarrfikëse për përballimin e situatës dhe vënien nën kontroll të flakëve, strukturat policore kanë nisur menjëherë veprimet hetimore për përcaktimin e shkakut të zjarrit dhe identifikimin e autorit të dyshuar.
Si pasojë e përhapjes së flakëve, zjarri ka përfshirë edhe territorin e fshatit Vranisht, duke djegur një sipërfaqe të madhe toke të mbjellë, si dhe bimësi të egër dhe pyjore.
Në vijim të veprimeve të thelluara hetimore të kryera për dokumentimin e plotë ligjor të ngjarjes, grumbullimin dhe administrimin e provave materiale dhe informacioneve të nevojshme, u bë i mundur identifikimi i autorit të dyshuar të zjarrvënies, shtetasi A. B., 25 vjeç, banues në fshatin Tërbaç.
Në përfundim të veprimeve hetimore, u bë arrestimi i tij.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprën penale “Shkatërrimi me zjarr i pyjeve dhe i mjedisit pyjor”, për veprime të mëtejshme.
Drejtoria Vendore e Policisë Vlorë apelon për të gjithë qytetarët që të mos ndezin zjarre për djegien e mbetjeve apo për qëllime të tjera, pasi përhapja e flakëve mund të sjellë pasoja të rënda për jetën, pronën dhe mjedisin.
Gjithashtu, fton qytetarët të denoncojnë në numrin 112 çdo rast zjarrvënieje apo paligjshmërie tjetër, duke garantuar anonimat të plotë, reagim të menjëhershëm dhe të paanshëm.
