Nickeil Alexander-Walker shpallet Lojtari më i Përmirësuar në NBA për sezonin 2025-26
Nickeil Alexander-Walker u nderua me çmimin Lojtari më i Përmirësuar i NBA-së për sezonin 2025-26, duke konfirmuar besimin që Atlanta Hawks vendosën në të gjatë verës së kaluar me performancën më të mirë në karrierën e tij.
Ai mposhti në garë për këtë çmim finalistët Deni Avdija nga Portland Trail Blazers dhe Jalen Duren nga Detroit Pistons.
Pas tetë sezoneve të para të karrierës ku luante kryesisht si lojtar zëvendësues për disa skuadra, Alexander-Walker nënshkroi verën e kaluar një kontratë katërvjeçare me Atlanta Hawks vlerë 62 milionë dollarë. Në periudhën 2019-20 deri 2024-25, ai pati një mesatare prej 8.6 pikësh, 2.5 kërcimesh dhe 2.3 asistimesh në 381 ndeshje, ndërsa rekord personal në pikë për sezon ishte 11.0 gjatë sezonit të tij të dytë me New Orleans Pelicans.
Trajneri kryesor Quin Snyder i besoi atij një rol më të rëndësishëm duke e bërë titullar të plotë në fillim të sezonit. Përgjigja e Alexander-Walker ishte përmirësim i ndjeshëm, duke vendosur rekorde karriere me një mesatare prej 20.8 pikësh, 39.9% në shënimin e trepikëshit, 3.7 asistime dhe 3.4 kërcime për ndeshje. Përveç përmirësimit në sulm, ai është vlerësuar gjithashtu për angazhimin e tij në mbrojtje.
Gjatë sezonit skuadra kaloi ndryshime të rëndësishme në përbërje. Trae Young, që kishte qenë ndër figurat kryesore për shtatë vjet, u transferua në janar te Washington Wizards. Kjo bëri që Alexander-Walker dhe Jalen Johnson të ishin motorët kryesorë të skuadrës nën drejtimin e Snyderit. Ata arritën të çonin Hawks në numrin më të madh të fitoreve që nga sezoni 2015-16 dhe në vendin e gjashtë në Konferencën Lindore për playoff.
Alexander-Walker është lojtari i dytë radhazi i Hawks që fiton çmimin e Lojtarit më të Përmirësuar dhe i treti në total që nga viti 1986 kur NBA filloi ta japë këtë çmim.
