Një grua ukrainase shpallet e dyshuar nga Interpol për shpërthimin në Monaco

Organizata Ndërkombëtare e Policisë Kriminale, Interpol, ka lëshuar një njoftim të kuq lidhur me një grua të dyshuar në lidhje me shpërthimin që tronditi Monaco-n. Incidenti ndodhi ditën e hënë dhe shkaktoi shqetësim të gjerë në këtë Principatë të vogël bregdetare.

Siç raporton CBS News, Interpol ka regjistruar nën “Red Notice” Anastasiia Berezovska, 39 vjeçe, e kërkuar nga autoritetet e Monacos për akuza për tentativë vrasjeje dhe vendosje të një pajisjeje shpërthyese në një rrugë publike. Ajo përshkruhet me një tatuazh që mund të jetë një gjarpër nga shpatulla deri te bërryla e djathtë dhe thuhet se flet gjermanisht. Sipas hetimeve, banesa e saj e fundit e njohur ishte në Gjermani dhe besohet se u largua duke kaluar përmes Francës e më pas Italisë, me një makinë me qira.

Autoritetet e Monacos nuk kanë konfirmuar zyrtarisht identitetin e viktimave, por mediat franceze dhe ukrainase raportojnë se synimi ishte biznesmeni Vadym Yermolaiev, 58 vjeç, bashkëjetuesja e tij dhe djali i tyre 13-vjeçar. Prokuroria vendase tha se shpërthimi u aktivizua nga distanca me një telekomandë, ndërsa pjesët e pajisjes shpërthyese po analizohen në Francë. Hetimi fillimisht u orientua te një person i fuqishëm që dukej mashkull, por rishikimi i pamjeve të kamerave dhe dëshmia e një dëshmitari çuan drejt hipotezës se bëhej fjalë për një grua e maskuar si burrë.

Sipas CBS News, ngjarja ka tronditur komunitetin në Monaco; Princi Albert II e quajti atë “një akt të neveritshëm” dhe të gjitha shërbimet publike u mobilizuan për të forcuar sigurinë dhe zbardhur rrethanat e sulmit.