Një shtetas iranian i kërkuar nga SHBA për sulme hakerash që shkaktuan 3.4 miliardë dollarë arrestohet në Mal të Zi

Një shtetas iranian, i akuzuar për sulme hakerash masive që sipas vlerësimeve shkaktuan dëm prej 3.4 miliardë dollarësh, është arrestuar në qytetin bregdetar të Kotorit në Mal të Zi, njoftoi policia lokale të enjten vonë.

Siç raporton CBS News, policia malazeze tha se 39-vjeçari me shtetësi të dyfishtë iraniane dhe turke është i kërkuar nga një gjykatë federale në New York për disa akuza, përfshirë komplot për kryerjen e mashtrimit kompjuterik, hakimin dhe vjedhjen e identitetit. Burimet thanë se ai u gjet dhe u arrestua në Kotor në kërkesë të autoriteteve amerikane dhe FBI-së.

Policia tha se që nga viti 2013, si bashkëpunëtor i një entiteti ligjor nga Irani, i dyshuari kreu sulme të mëdha kibernetike ndaj infrastrukturës amerikane, përfshirë rreth 150 universitete. Të dhënat e vjedhura dhe profilet e komprometuara u përdorën, sipas njoftimeve, në dobi të Gardës Revolucionare Islamike dhe përfituesve të tjerë iranianë, përfshirë institucione arsimore në Iran.

Çështja e ekstradimit do të trajtohet nga një gjykatë në Podgoricë. Mal i Zi, vend anëtar i NATO-s me rreth 620,000 banorë, konsiderohet si një nga vendet e radhës drejt anëtarësimit në Bashkimin Evropian.

Sipas CBS News, në raportimin fillestar ka pasur kontribute edhe nga Agjencia Associated Press.