OKB – Erdogan: Rindërtimi i Gazës të fillojë pa vonesë

NJU JORK, 22 shtator /ATSH-AA/ – Presidenti turk Recep Tayyip Erdogan bëri thirrje që rindërtimi i Gazës të fillojë pa vonesë dhe i bëri thirrje komunitetit ndërkombëtar të rrisë presionin ndaj Izraelit.

Duke folur në sesionin e 81-të të Asamblesë së Përgjithshme të OKB-së në Nju Jork, Erdogan tha se përpjekjet për rindërtimin e Gazës duhet të fillojnë sa më shpejt të jetë e mundur.

“Duhet të fillojmë rindërtimin e Gazës pa humbur kohë. Në këtë drejtim, ju bëj thirrje që të ushtroni presion më të madh ndaj Izraelit”, tha ai.

Presidenti Erdogan tha se përpjekjet për të parandaluar krijimin e një shteti palestinez përfundimisht do të dështojnë.

“Të gjithë duhet ta kuptojnë dhe ta pranojnë tani këtë; Përpjekjet për ta mbytur shtetin e Palestinës do të përfundojnë me dështim”, tha ai.

Ai shprehu shpresën se përfundimisht do të krijohet një shtet palestinez i pavarur dhe me integritet territorial, i bazuar në kufijtë e vitit 1967 dhe me Jeruzalemin Lindor si kryeqytet.

“Me dëshirën e Zotit, do t’i shohim ato ditë të bukura kur do të krijohet një shtet i pavarur dhe me integritet territorial i Palestinës, brenda kufijve të vitit 1967 dhe me Jeruzalemin Lindor si kryeqytet”, tha Erdogan.

Erdogan u bëri thirrje vendeve që të njohin shtetin palestinez.

“Sot, edhe një herë u bëj thirrje të gjitha vendeve që ende nuk e kanë njohur shtetin e Palestinës që të rishqyrtojnë vendimet e tyre”, tha ai./ /Ad.Ab./ a.jor.