Oklahoma padit Roblox, akuzon platformën për dështime në mbrojtjen e fëmijëve
Prokurori i Përgjithshëm i Oklahomës, Gentner Drummond, depozitoi një padinë 51-faqëshe në Gjykatën e Qarkut të Cleveland-it, ku akuzon platformën e lojërave Roblox për moszbatimin e masave themelore të sigurisë dhe për vënien e rritjes së numrit të përdoruesve mbi mbrojtjen e fëmijëve. Padia pretendon se dizajni i platformës e vështirëson monitorimin nga prindërit dhe ka lejuar aksesin e të rriturve të rrezikshëm, përfshirë raste që përfshijnë përmbajtje penale, dhunë dhe materiale seksuale.
Raporton CBS News, në padinë përmendet një rast nga shtatori kur një nënë në Oklahoma paditi Roblox pasi vajza e saj, atëherë 12 vjeçe, u detyrua të dërgonte foto dhe video eksplicite një burri në të dyzetat që vetëprezentonte si adoleshent në platformë. E njëjta padie përmend një hetim të vitit të kaluar që zbuloi gjuhë urrejtjeje dhe simbole naziste në disa vende të lojës, si dhe pretendime se moderimi mund të evitohej nga përdoruesit. Kompania nga ana e saj ka thënë se ka ndërtuar një sistem shumë-shtresor mbrojtjeje, me detektim të mbështetur nga AI, moderim njerëzor dhe filtrime për të parandaluar shkëmbimin e informacionit personal, dhe po prezanton kontrolle prindërore më të gjera për përdoruesit nën 16 vjeç.
Padia e Oklahomës pretendon shkelje të Aktit për Mbrojtjen e Konsumatorit, duke akuzuar Roblox se ka bërë deklarata të pasakta ndaj konsumatorëve duke fshehur rreziqet reale për fëmijët. Si ndëshkim, shteti kërkon gjoba civile për çdo shkelje të ligjit, si dhe urdhra të përhershëm që ndalojnë praktikat mashtruese dhe detyrojnë implementimin e masave të forta dhe të qëndrueshme të sigurisë.
Sipas padisë, platforma pret më shumë se 150 milionë përdorues aktivë në ditë, sipas vetë Roblox, dhe pretendimet e shtetit përfshijnë se deri në dy të tretat e fëmijëve amerikanë të moshës 9 deri 12 vjeç mund të kenë llogari në platformë. Roblox ka deklaruar se është platforma e parë e lojërave online që kërkon verifikim moshe për të gjithë përdoruesit që hyjnë në funksionet e chat-it dhe se nuk lejon shkëmbimin e imazheve apo videove përmes bisedave, si dhe bashkëpunon me zyrat e zbatimit të ligjit kur identifikohen shkelje.
Sipas CBS News, të paktën një duzinë shtetesh kanë ndjekur veprime ligjore kundër Roblox, dhe të paktën tre prej tyre kanë arritur marrëveshje me kompaninë. Oklahoma kërkon që gjykata të vendosë masa që detyrojnë platformën të përmirësojë mbrojtjet dhe të ndalojë praktikat që, sipas padisë, ekspozojnë fëmijët ndaj rreziqeve serioze.
