Papa i kërkon SSPX të tërhiqet nga plani për shugurimin e ipeshkvijve pa miratim
Papa Leo XIV i bëri thirrje me forcë një grupi tradicionalistësh katolikë që janë larguar nga struktura zyrtare e Kishës të tërhiqen nga plani për të shuguruar ipeshkvij të rinj pa miratimin e Papës, duke e cilësuar këtë veprim si skizmë dhe “mëkat me peshë të madhe”. Në një letër dërguar kreut të Shoqërisë së Shën Pio X, priftit Davide Pagliarani, Papa paralajmëroi se shugurimet e parashikuara në seminarin e Écône në Zvicër përbëjnë shkelje të ligjit kanonik dhe sjellin ekskomunikim automatik për ipeshkvijtë dhe për atë që do t’i shugurojë.
Shoqëria e Shën Pio X (SSPX) u krijua në kundërshtim me reformat e Koncilit të Dytë Vatikana të viteve 1960, të cilat ndryshuan marrëdhëniet e Kishës me të tjerët dhe lejuan kremtimin e Meshës në gjuhët vendase në vend të latinishtes. Në vitin 1988, themeluesi Marcel Lefebvre shuguroi katër ipeshkvij pa miratimin papnor, një akt që çoi në ekskomunikimin e tij dhe të ipeshkvijve të tjerë, raporton Associated Press. Sipas statistikave të Shoqërisë, grupi numëron sot dy ipeshkvij, 751 priftërinj, 264 seminaristë, 145 vëllezër religjiozë, 88 oblate dhe 250 motra nga rreth 50 vende.
Vatikani ka paralajmëruar se një veprim i ngjashëm do të sjellë të njëjtat pasoja kanonike. Në letrën e tij, Papa ripërsëriti ofertën për dialog me Shoqërinë dhe i kërkoi udhëheqjes të vlerësojë mirëqenien shpirtërore të besimtarëve, duke vënë në dukje se akti skizmatik mund t’i privonte ata nga pranimi i ligjshëm dhe, në disa raste, nga pranimi i vlefshëm i sakramenteve.
Megjithëse akti skizmatik i vitit 1988 la Shoqërinë pa status kanonik, ajo ka vazhduar të zgjerohet dhe perceptohet si një realitet paralel me orientim para-Koncilit që shqetëson Selinë e Shenjtë; sipas Associated Press, Vatikani ka përsëritur ftesën për bisedime dhe ka paralajmëruar për pasojat kanonike nëse shugurimet do të kryhen.
