Pilotët nervozë dhe motori një dështim! Nuk ka paqe te Ferrari këtë sezon
Pa pod që prej korrikut, rritet pakënaqësia te skuderia italiane, ndërsa fjalët e Horner kanë sjellë dyshime. Elkann kishte premtuar titullin deri në 2026-ën.
Jo, nuk është Christian Horner problemi i Ferrari-it. Është përsëritja e një historie që vazhdon të trazojë ujërat në Maranello dhe që duket se përkeqësohet nga fundjava në fundjavë. Gara e shumëpritur e shtëpisë, me motorin e ri që shihej si shpëtimi i sezonit, nuk dha rezultatet e shpresuara. Dhe kështu, lista e garave pa pod për një skuderi që synonte titullin, po zgjatet shumë.
Nga gara e Spa në korrik, Ferrari nuk është ngjitur në pod. Në Baku skuadra italiane u ndal te vendi i 4-t me Charles Leclerc dhe i 6-ti me Lewis Hamilton. Red Bull duket më solid me 5 pode në 6 garat e fundit. Pa folur për Mercedes-in, që fluturon i vetëm në krye të një sezoni si dominues dhe që nuk e llogarit më Ferrari-n si rival të rrezikshëm.
Një kuadër i tillë shqetëson jo pak në Maranello, projekti i power unit të këtij viti rezultoi dështim. Motori nuk është elementi i vetëm që trazon ujërat te Ferrari. Dhe kur disa elementë nuk funksionojnë, zërat për ndryshime në drejtim shtohen.
Aktori i parë i situatës komplekse është Lewis Hamilton, cili prej kohësh flet për ndryshime të nevojshme dhe rregulla pagash mes pilotëve. Ai i ka kërkuar publikisht sqarime skuadrës. Hamilton, pas një gare anonime në Baku, iu përgjigj me fjalë njërrokëshë gazetarëve, edhe për temën Horner-Vasseur.
Ishte kapitulli “Horner” që hapi një fazë të re në situatën komplekse të Ferrari-t. Ish-drejtuesi i Red Bull dha një intervistë për “Times”, që për pak orë u bë argumenti kryesor i diskutimit në Baku.
“Ka vetëm një skuadër në Formula 1, ku do të pranoja të shkoja pa kuota aksionare. Ferrari është marka më e rëndësishme në sportin tonë, është një ëndërr”, – tha Horner, duke hedhur kandidaturën, por për momentin është vetëm një ide për Ferrari-n. Tani është edhe një çështje personale për presdentin Elkann, që kishte premtuar titullin deri në 2026-ën. Një premtim që duket ende një ëndërr e pamundur.
