Prindi padit shkollat e Grosse Pointe për ndalimin që lidhet me një postim mbi flamurin LGBTQ+
Një prind ka ngritur padi në gjykatën federale më 23 mars, duke akuzuar sistemin shkollor publik të Grosse Pointe se ka shkelur të drejtën e tij për lirinë e shprehjes sipas Amendamentit të Parë, si dhe e ka shpifur, pasi e ndaloi të hynte në ambientet e shkollës. Masa u mor pasi ai publikoi një video ku kritikonte vendosjen e flamurit LGBTQ+ në një klasë dhe pretendonte se mësuesit po indoktrinonin nxënësit.
Sipas padisë, Gary Pruitt kishte marrë pjesë në një aktivitet shkollor në shtator 2024 në Parcells Middle School, ku pa flamujt LGBTQ+. Ai kontaktoi drejtuesit e shkollës për të kërkuar sqarime mbi përmbajtjen që u mësohej nxënësve dhe u orientua të komunikonte me bordin e shkollës. Një anëtare e bordit i tha se ligji i Michigan-it kërkon mbrojtjen e nxënësve LGBTQ+ dhe se nuk priteshin ndryshime në këtë drejtim.
Më vonë, Pruitt publikoi në Facebook një video nga klasa, ku e cilësoi flamurin si pjesë të një “programimi radikal” dhe ngriti shqetësime për ndikimin mbi fëmijët. Ai u bëri thirrje prindërve të reagojnë ndaj asaj që e quajti përhapje e një botëkuptimi të shtrembëruar nga disa mësues.
Pas publikimit të videos, distrikti shkollor e ndaloi Pruitt-in të hynte në të gjitha ambientet e tij, ndërsa policia i dorëzoi një njoftim zyrtar në shtëpi. Ai pretendon se shkolla e etiketoi si shkelës (trespasser) dhe publikoi fotografinë e tij, çka sipas tij ndikoi negativisht edhe tek fëmija i tij, i cili u bë objekt talljeje nga nxënësit e tjerë.
Autoritetet shkollore argumentojnë se videoja u konsiderua kërcënuese dhe shqetësuese për komunitetin dhe se termat e përdorur nga Pruitt ishin shpifës. Sipas tyre, ndalimi ishte i nevojshëm për të shmangur përçarje në ambientin arsimor. Ndërkohë, avokati i Pruitt thotë se klienti i tij është penguar të marrë pjesë në aktivitete shkollore dhe kërkon heqjen e ndalimit si dhe dëmshpërblim për dëmet emocionale dhe reputacionin.
Rasti vjen në një kohë kur politikat shkollore për përfshirjen e komunitetit LGBTQ+ janë në qendër të debatit në Michigan. Departamenti amerikan i Drejtësisë ka nisur hetime ndaj disa distrikteve shkollore lidhur me kurrikulën dhe trajtimin e çështjeve të identitetit gjinor, ndërsa autoritetet shtetërore këmbëngulin se udhëzimet janë fleksibile dhe u japin prindërve mundësinë për të përjashtuar fëmijët nga tema të caktuara.
