“Ronaldo shpërtheu se u ndje i tradhtuar nga Jesus”, një mik i sulmuesit tregon prapaskenën

Cristiano Ronaldo thuhet se vendosi të largohej nga kampi stërvitor i ekipit kombëtar në Kopenhagen sepse ndihej i “tradhtuar” nga Jorge Jesus.

Ky pohim u bë nga gazetari spanjoll Edu Aguirre në programin “El Chiringuito”, i njohur për marrëdhënien dhe miqësinë e tij të ngushtë me sulmuesin portugez, e cila ka zgjatur prej shumë vitesh.

Sipas rrëfimit të gazetarit spanjoll, pika e kthesës ndodhi pas një takimi të mbajtur të martën në mbrëmje, ku morën pjesë Cristiano Ronaldo, Jorge Jesus dhe Pedro Proença, president i Federatës Portugeze të Futbollit (FPF). Gjatë kësaj bisede, trajneri i ekipit kombëtar, shton i njëjti burim, pranoi se kishte gabuar kur kishte nxjerrë në nxemje CR7-ën për rreth 30 minuta dhe më pas nuk e kishte aktivizuar në ndeshjen kundër Norvegjisë. Trajneri një fakt të tillë e pranoi edhe publikisht në konferencën për shtyp.

“Të martën në mbrëmje pati një takim midis presidentit të Federatës, Jorge Jesus dhe Cristianos. Jorge Jesus kërkoi falje që e la Cristianon të bënte nxemje për 30 minuta pa u futur në fushë”, zbuloi Edu Aguirre, duke shtuar detaje të angazhimit të bërë: “Dhe jo vetëm që kërkoi falje privatisht, por tha gjithashtu se do të kërkojë falje publikisht. Ky ishte premtimi i Jorge Jesus ndaj Cristiano Ronaldos”.

Megjithatë, rezultati doli të ishte krejt ndryshe. Orë më vonë, kur u paraqit para gazetarëve, fjalimi i Jorge Jesus thuhet se ishte i kundërt me atë që ishte rënë dakord pas dyerve të mbyllura, duke shkaktuar zemërimin e lojtarit ndërkombëtar portugez.

“Pastaj, Jorge Jesus shkon në konferencën për shtyp dhe thotë të gjitha ato gënjeshtra me gjoksin e fryrë. Kjo është arsyeja pse Cristiano shpërthen. Sepse ndihet i tradhtuar”, shtoi gazetari spanjoll.