Sezona e rriçkave pritet të jetë më e ashpër, shtohen vizitat në urgjencë në pjesë të mëdha të SHBA-së
Qendrat për Kontrollin dhe Parandalimin e Sëmundjeve (CDC) kanë regjistruar nivelin më të lartë të vizitave në urgjencë për pickime rriçkash që nga viti 2017 në shumicën e vendit. Rebecca Osborn, epidemiologe në Departamentin e Shëndetit të Wisconsin, thotë se rriçkat po përhapen në zona të reja për shkak të ndryshimeve klimatike, pasi temperaturat më të ngrohta favorizojnë prezencën e tyre.
Siç raporton CBS News, autoritetet paralajmërojnë për disa kërcënime specifike: rriçka lone star mund të bartë alfa-gal, që lidhët me zhvillimin e alergjisë ndaj mishit të kuq, ndërsa virusi Powassan sulmon sistemin nervor qendror dhe mund të shkaktojë humbje të memories, vështirësi në të folur dhe konvulsione. CDC vë në dukje se heqja e rriçkave brenda 24 orëve ul rrezikun e sëmundjes Lyme; procedurat e rekomanduara janë heqja sa më e shpejtë me pincë ose pajisje për heqjen e rriçkave, kontrolli i trupit për rriçka të tjera dhe konsultimi me mjekun në rast të shfaqjes së skuqjeve ose etheve pas pickimit.
Në kampin e YMCA-s Camp Edwards pranë East Troy në Wisconsin, stafi tregon se fëmijët mësojnë të kontrollojnë trupin për rriçka si pjesë të aktiviteteve të verës. Këshilltarët Maggie Windon dhe Torie Hall thanë se gjetën rriçka të ngulitura te disa fëmijë dhe se bëjnë kontrolle të rregullta, përfshirë inspektimin e flokëve dhe pjesës së pasme të qafës. Përdorimi i repelentëve dhe veshja me rroba të gjata mbeten linja e parë e mbrojtjes, por stafi nënvizon rëndësinë e vëmendjes së vazhdueshme.
Sipas CBS News, megjithëse ka fushata informuese për parandalimin e pickimeve, sëmundjet e transmetuara nga rriçkat po rriten, ndaj ekspertët këshillojnë vigjilencë dhe zbatimin e këshillave të thjeshta për të reduktuar rrezikun.
