SHBA – Demokratët kërkojnë një Obama të ri, Jon Ossoff fiton në Xhorxhia, ngjall shpresat për zgjedhjet presidenciale 2028
UASHINGTON, 4 nëntor /ATSH-AFP/- Fitorja e senatorit demokrat, Jon Ossoff në zgjedhjet e mesmandatit në shtetin e Xhorxhias ka shtuar diskutimet brenda Partisë Demokratike për mundësinë që ai të jetë një nga kandidatët kryesorë për zgjedhjet presidenciale të vitit 2028.
39-vjeçari siguroi rizgjedhjen në Senatin amerikan, duke mundur kandidatin republikan Mike Collins, në një shtet që presidenti Donald Trump e fitoi në zgjedhjet presidenciale të vitit 2024.
Rezultati ka rëndësi për demokratët, pasi Ossoff ishte i vetmi senator demokrat që kërkonte rizgjedhjen në një shtet të fituar nga Trump në zgjedhjet e fundit presidenciale. Fitorja e tij u konsiderua një sukses i rëndësishëm për partinë, edhe pse nuk përbën fitim të një vendi të ri në Senat, por ruajtje të një mandati që demokratët e kishin.
Krahasimet me Barack Obama
Ossoff ka tërhequr vëmendjen e një pjese të elektoratit demokrat për mënyrën e komunikimit, paraqitjen publike dhe mesazhet që përcjell. Disa mbështetës e krahasojnë me ish-presidentin Barack Obama, duke vlerësuar aftësinë e tij për të komunikuar me grupe të ndryshme votuesish dhe për të kapërcyer ndarjet partiake.
Gjatë fushatës, Ossoff mbajti një qëndrim të ashpër ndaj presidentit Trump, duke kritikuar mënyrën se si ai po drejton vendin dhe duke ngritur akuza për përdorimin e postit presidencial për interesa personale.
Fjalimet e tij kundër administratës republikane kanë tërhequr vëmendje në nivel kombëtar dhe kanë ndihmuar në rritjen e profilit të tij politik. Trump e ka sulmuar publikisht senatorin, ndërsa edhe zyrtarë të Shtëpisë së Bardhë kanë përdorur gjuhë fyese ndaj tij.
Megjithatë, mbështetësit e Ossoff e vlerësojnë si një politikan autentik, të drejtpërdrejtë dhe të aftë për të bashkuar votues përtej ndarjeve politike.
“Kur flet, më kujton Barack Obamën”, tha për AFP një mbështetëse e tij, duke vlerësuar mënyrën empatike dhe të natyrshme të komunikimit të senatorit.
Obama doli në mbështetje të tij gjatë fushatës
Krahasimet me ish-presidentin demokrat janë shtuar edhe pas përfshirjes së Obama-s në fushatën e Ossoff. Ish-presidenti mori pjesë në aktivitete elektorale për të mbështetur rizgjedhjen e senatorit, duke i dhënë më shumë vëmendje kombëtare garës në Xhorxhia.
Obama mbetet një nga figurat më me ndikim në Partinë Demokratike dhe një pikë referimi për shumë votues të saj. Për disa mbështetës, Ossoff mund të përfaqësojë një brez të ri drejtuesish që mund të rikthejë entuziazmin e krijuar nga fushata e Obamës.
Megjithatë, jo të gjithë janë të bindur se krahasimi mes dy politikanëve është i drejtë. Disa mbështetës vlerësojnë aftësitë e Ossoff, por theksojnë se ai duhet të ndërtojë profilin e tij politik dhe të mos shihet thjesht si një pasardhës i Obama-s.
Nga ndihmës i një figure të lëvizjes për të drejtat civile te Senati
Ossoff u bë i njohur në nivel kombëtar në vitin 2021, kur fitoi një garë të përsëritur në Xhorxhia dhe siguroi një vend në Senat, duke marrë një mandat që më parë mbahej nga republikanët.
Në moshën 33-vjeçare, ai u bë senatori më i ri në atë legjislaturë. Përpara se të hynte në politikë, kishte punuar si ndihmës i John Lewis, një prej figurave të njohura të lëvizjes për të drejtat civile në SHBA. Më pas drejtoi një kompani që prodhonte dokumentarë, me fokus të veçantë te rastet e korrupsionit.
Rizgjedhja e tij në Xhorxhia forcon pozitat e tij brenda Partisë Demokratike në një moment kur kjo parti po kërkon figura të reja për të ndërtuar strategjinë e saj drejt zgjedhjeve presidenciale të vitit 2028.
A do të kandidojë për president në vitin 2028?
Pavarësisht se emri i tij po përmendet gjithnjë e më shumë në diskutimet për garën presidenciale, Ossoff ka deklaruar se nuk ka interes të kandidojë për president.
Megjithatë, fitorja në Xhorxhia dhe rritja e vëmendjes kombëtare mund ta vendosin atë mes figurave që demokratët do të shqyrtojnë për të përfaqësuar partinë në zgjedhjet e ardhshme.
Për momentin, gara për kandidaturën demokrate të vitit 2028 mbetet e hapur dhe në parti nuk ka ende një emër të përcaktuar. Por suksesi i Ossoff tregon se një pjesë e elektoratit demokrat po kërkon drejtues më të rinj, me aftësi komunikimi dhe me një qëndrim të qartë kundër politikave të Trump. /
