SHBA fshehurazi deporton emigrantë meksikanë në Guatemala dhe Honduras; Meksika proteston
Zyrtarë të Departamentit të Sigurisë Kombëtare thanë se administrata amerikane ka nisur fshehurazi deportime të emigrantëve meksikanë duke i dërguar në Guatemala dhe Honduras, përmes fluturimeve që kalojnë mbi territorin meksikan në vend që t’i kthejnë drejtpërdrejt në Meksikë.
Siç raporton CBS News, zyrtarët shtuan se e një prej synimeve të këtyre deportimeve, të cilat nuk janë shpallur zyrtarisht, është të pengohet emigracioni i paligjshëm duke dërguar disa shtetas meksikanë më larg nga kufiri me SHBA; operacionet po zhvillohen prej disa muajsh dhe sipas zyrtarëve kanë përfshirë qindra persona, megjithëse numri i saktë nuk është i qartë.
Ministria e Jashtme e Meksikës i shprehu qeverisë amerikane kundërshtimet, duke theksuar se pranon kthimin e të gjithë shtetasve të saj dhe refuzon deportimin e tyre në vende të treta. Sipas deklaratës zyrtare, Meksika nuk ka asnjë marrëveshje për të lejuar dërgimin e shtetasve të saj në vende të tjera dhe insiston për kthim të sigurt dhe me dinjitet në territorin kombëtar.
Analistë të migracionit vlerësuan se dërgimi i qytetarëve meksikanë në vende të tjera të rajonit është një masë e paprecedentë dhe ka një përmbajtje ndëshkuese dhe kërcënuese, me qëllim të dekurajimit. Nën administratën Trump është rritur përdorimi i deportimeve drejt ashtuquajturave “vende të treta”; përfaqësuesit e Departamentit të Sigurisë Kombëtare nuk u përgjigjën pyetjeve për këto praktika.
Sipas CBS News, kërkesat për koment ndaj qeverive të Hondurasit dhe Guatemalës për marrëveshjet e mundshme ose detaje të operacioneve nuk kanë marrë përgjigje.
