SHBA – Trump pranon humbjen, por nuk merr përgjegjësi për të
UASHINGTON, 4 nëntor /ATSH-AFP/ – Presidenti amerikan, Donald Trump deklaroi se “e pranonte” rezultatin e zgjedhjeve të mesit të mandatit, ku një valë demokratësh përfshiu vendin, por refuzoi të merrte përgjegjësinë për humbjen.
“Jam plotësisht i gatshëm t’i pranoj këto rezultate”, deklaroi ai për gazetën “The New York Times”.
“Do të punojmë me demokratët”, shtoi ai.
Në të njëjtën frymë pajtuese, ai përgëzoi disa herë kundërshtarët e tij gjatë një interviste të gjatë telefonike për “Fox News”, duke vlerësuar se ata “kishin luftuar mirë”.
Megjithatë, ai theksoi vazhdimisht se kishte “fuqinë e vetos” ndaj ligjeve që do të miratonte një Kongres i kontrolluar nga demokratët.
Trump pranoi se lufta jashtëzakonisht jopopullore kundër Iranit kishte ndikuar “pjesërisht” në rezultatet zgjedhore, por argumentoi se “njerëzit e kuptonin rëndësinë” e asaj që kishte bërë duke nisur konfliktin.
Përballë fitoreve të shumta të opozitës, e cila mori kontrollin e të dy dhomave të Kongresit, duke fituar edhe në bastione tradicionale konservatore si Teksasi dhe Kansasi, republikani nuk ka ndërmend të kundërshtojë rezultatin e zgjedhjeve.
Kjo nuk ishte e sigurt, duke pasur parasysh se Trump ende refuzon të njohë humbjen në zgjedhjet presidenciale të vitit 2020 dhe kishte ngritur akuza për mashtrim zgjedhor edhe përpara zgjedhjeve të mesit të mandatit.
Megjithatë, presidenti amerikan nuk ishte i gatshëm të pranonte një humbje personale, pavarësisht se amerikanët dënuan gjerësisht bilancin e tij qeverisës, veçanërisht për sa i përket kostos së jetesës./ a.jor.
