Shefi italian i kuzhinës pushohet nga puna pasi refuzoi të vendoste ananas në picë
Një shef kuzhine italian i pushuar nga puna në një restorant në Brisbane kishte refuzuar të vendoste ananas në picë sepse kjo ishte një “fyerje për kulturën e tij”.
Davide Tamburella u pushua nga puna nga restoranti La Costa, i cili tani është mbyllur, në maj, dy javë pas një takimi me menaxhmentin, i cili kishte një sërë ankesash për sjelljen e shefit të kuzhinës, shkruan Euronews.
Midis tyre ishte refuzimi i Tamburellës për të ofruar pica me proshutë dhe ananas për mysafirët në një aktivitet. Në atë kohë, shefi i kuzhinës kishte deklaruar se çdo udhëzim nga menaxhmenti “nuk duhet të ndiqet kur është fyes për kulturën e tij”.
Detajet dolën në dritë pasi shefi i kuzhinës iu drejtua Komisionit të Punës së Drejtë të Australisë duke pretenduar se ishte pushuar padrejtësisht nga puna.
Në vendimin e lëshuar të martën, komisioni vuri në dukje se refuzimi i Tamburellës për të vendosur ananas në pica ishte sepse “ai e konsideron, si italian, se vendosja e ananasit në picë është një fyerje për kulturën e tij”.
Gjithashtu vuri në dukje se ishte hera e tretë që Tamburella kishte refuzuar të përdorte frutin në pica në katër vitet e fundit.
Ai më parë i kishte kërkuar shefit të tij të “kontrollonte sa e rëndësishme është që italianët të mos vendosin ananas në picë”.
Shteti i Queensland, ku ndodhet restoranti, konsiderohet zemra e ananasit të Australisë dhe prodhon të gjithë ananasit e rritur komercialisht në vend.
Në Bregun Diellor, vizitorët ndalen rregullisht për të bërë foto pranë Ananasit të Madh, një model 16 metra i lartë prej fibre qelqi i listuar në trashëgiminë kulturore, i cili është bërë një pikë referimi lokale.
Shqetësime të tjera u ngritën në lidhje me përdorimin e gjuhës së ndyrë nga Tamburella, stilin e tij të komunikimit dhe “përshkallëzimin e frustrimit në vendin e punës”.
Vendimi detajoi gjithashtu një incident në punë në prill të këtij viti, ku Tamburella theu kockat në dorën e djathtë kur goditi një parmak metalik.
Tamburella kishte shpresuar që restoranti do të sponsorizonte një vizë për të që u lejon punëtorëve të kualifikuar të jenë banorë të përhershëm.
Megjithatë, pas shkarkimit të tij, restoranti e përfundoi atë proces, dëgjoi gjykata.
Ai e humbi padinë e tij për shkarkim të padrejtë me arsyetimin se kërkesa ishte paraqitur shumë vonë, sipas vendimit.
Drejtori menaxhues i restorantit, Elliot Ingram, i tha Daily Mail se “kjo histori kishte më shumë sesa një shtresë picash”.
BBC i është drejtuar Tamburellës për koment.
Në profilin e shefit të kuzhinës në LinkedIn, ai e përshkruan veten si dikush që, gjatë gjithë karrierës së tij, është përqendruar në “ofrimin e ushqimit të jashtëzakonshëm” dhe “përmirësimin e performancës së biznesit”.
Tre muaj më parë ai postoi një “letër për shefat e kuzhinës” me temën “respektimi i përbërësve”.
Profili në LinkedIn thotë se ai tani punon në një restorant tjetër në Brisbane. Një kontroll i BBC-së ka zbuluar se ananasi nuk është në menunë e atij restoranti.
