Shtetet e Bashkuara monitorojnë tregjet e naftës për manipulim çmimesh dhe i kërkojnë shteteve të ndihmojnë hetimet
Rregullatorët antitrust të Shteteve të Bashkuara po monitorojnë me vëmendje tregjet e naftës për shenja të mundshme manipulimi të çmimeve ose monopolizimi të tregut, dhe u kanë kërkuar prokurorëve të përgjithshëm të shteteve të bashkëpunojnë në hetimet për sjellje të paligjshme.
Siç raporton CBS News, në një letër drejtuar autoriteteve shtetërore, zyrtarë të Departamentit të Drejtësisë dhe të Komisionit Federal të Tregtisë theksuan se luhatjet e fundit të çmimeve të naftës nuk pezullojnë zbatimin e ligjeve antitrust apo të mbrojtjes së konsumatorit, dhe nuk autorizojnë kompanitë të manipulojnë çmimet apo të bashkëpunojnë me konkurrentët. Në shkresë përmenden Stanley Woodward, zv/ndihmës i përgjithshëm i Departamentit që mbikëqyr Divizionin e Antitrustit, dhe Andrew Ferguson, kreu i FTC-së.
Zyrtarët paralajmëruan se bizneset nuk duhet të përdorin volatilitetin e tregut si mburojë për praktika antikonkurruese, mashtrim apo sjellje të tjera që dëmtojnë konsumatorët amerikanë. Ata gjithashtu nxitën shtetet të shqyrtojnë zbatimin e ligjeve të tyre kundër shfrytëzimit të çmimeve gjatë periudhave me tronditje tregu ose emergjencash, pasi kompetencat federale për ndjekjen e këtyre rasteve janë të kufizuara.
Sipas CBS News, letra i bëri thirrje prokurorëve të përgjithshëm të rishikonin rastet e dyshimta dhe, nëse rezulton e nevojshme, të ndërmerrnin veprime ligjore në përputhje me legjislacionin vendor për të mbrojtur konsumatorët.
