Sindikata: Nxënësit e shkollës “Abdyl Frashëri” po detyrohen të pastrojnë objektin gjatë grevës së punëtorëve teknikë

Federata Sindikale e Punëtorëve Teknikë të Sektorit Privat të Kosovës ka reaguar të hënën ndaj, siç thotë, detyrimit të nxënësve për të pastruar objektin e shkollës së bujqësisë “Abdyl Frashëri” në Prishtinë, në kohën kur punëtorët teknikë janë në grevë, siç njofton Telegrafi.

Sipas federatës, nxënësit po humbin orët mësimore duke kryer punë që u takojnë punëtorëve përgjegjës për pastrimin e objektit shkollor. Ajo e ka cilësuar këtë praktikë të papranueshme, duke theksuar se nxënësit nuk duhet të detyrohen të kryejnë detyrat e punëtorëve që janë në grevë.

“Zëvendësimi i punëtorëve grevistë përmes kryerjes së detyrave të tyre nga persona të tjerë është në kundërshtim me legjislacionin në fuqi”, thuhet në reagimin e federatës, të cilin e përcjell Telegrafi.

Federata ka kërkuar që kjo praktikë të ndërpritet menjëherë dhe që nxënësit të mos pengohen në procesin mësimor për shkak të grevës. Greva e punëtorëve teknikë në shkollat e Prishtinës po vazhdon prej ditësh, ndërsa kërkesa e tyre lidhet me respektimin e pagës minimale. Deri në publikimin e këtij lajmi, drejtoria e shkollës dhe institucionet përgjegjëse nuk kanë dhënë qëndrim lidhur me këto pretendime.