Subaru tërheq mbi 541,000 automjete për shkak të gabimit në etiketim

Subaru of America ka nisur tërheqjen e më shumë se 541,000 automjeteve pas zbulimit të një gabimi në etiketat e certifikimit, që tregon një vlerë të pasaktë të kapacitetit të boshtit dhe mund të lejojë mbingarkimin e automjetit, duke rritur rrezikun e aksidenteve.

Sipas CBS News, Administrata Kombëtare për Sigurinë e Trafikut në Autostrada (NHTSA) tha në njoftimin e tërheqjes se etiketat përmbajnë një GAWR të pasaktë — pra vlerën e ngarkesës që mund të mbajë një sistem boshti — dhe se kjo pasaktësi mund të çojë në situata me peshë mbi limite të sigurisë.

Tërheqja përfshin disa modele: Crosstrek Hybrid të vitit 2026, Forester dhe Forester Hybrid për vitet 2025–2026, si dhe Ascent për periudhën 2019–2026. Dokumentet e tërheqjes tregojnë se të gjitha 541,237 automjetet e përfshira kanë këtë defekt.

NHTSA e informoi Subaru-n për çështjen në maj, dhe kompania thotë se nuk ka raportime për aksidente apo lëndime të lidhura me gabimin në etiketim. Pronarit të automjeteve do t’u dërgohet një etiketë e re certifikimi me udhëzime për ta vendosur mbi etiketën aktuale, ndërsa zëvendësimi mund të kryhet edhe nga një servis i autorizuar pa pagesë.

Sipas CBS News, letrat informuese për pronarët do të dërgohen më 25 gusht 2026, dhe numri i tërheqjes së Subaru është WRH-26.