Sulm me shpatë në shkollë në Suedi: 1 i vrarë, 2 të plagosur
Në një sulm me shpatë të ndodhur të premten në shkollën Brinell në Fagersta, në veri-perëndim të Stokholmit, një person vdiq dhe të paktën dy të tjerë u plagosën rëndë. Autoritetet thanë se sulmuesi, një 18-vjeçar, është arrestuar dhe gjatë arrestimit u qëllua me armë; nuk është bërë e qartë nëse i dyshuari u plagos, por ai mbahet në paraburgim dhe nuk po trajtohet në spital.
Siç raporton CBS News, incidenti ndodhi ndërsa mësimet ishin në zhvillim dhe në shkollë ndodheshin rreth 400 deri në 500 nxënës. Qarku Västmanland njoftoi se dy të plagosurit rëndë janë djem midis 12 dhe 17 vjeç; autoritetet nuk dhanë detaje për personin e vdekur. Shefi i policisë, Tommy Alriksson, tha se për momentin nuk ka indicie që të jenë të përfshirë shumë autorë dhe se hetimet vijojnë, përfshirë bastisje të kryera në dy banesa dhe intervistimin e dëshmitarëve.
Portavokali i policisë, Pelle Vamstad, tha se alarmi u marrë të premten në mesditë dhe policia u nis menjëherë në vendngjarje, ku do të kontrollojë edhe incizimet e mundshme të kamerave si pjesë të hetimit. Policia dhe shërbimet e emergjencës gjetën personin e vrarë pasi hynë në ndërtesë për ta siguruar atë. Kryeministri suedez Ulf Kristersson e përshkroi ngjarjen si një incident të rëndë dhe shprehu ngushëllimet e tij për të prekurit.
Komuna e Fagersta vendosi një qendër krize në një palestrë pranë shkollës, ndërsa disa shkolla përreth mbetën të mbyllura dhe u vendosën bllokada rrugore gjatë operacionit. Sipas CBS News, hetimet vijojnë dhe autoritetet po punojnë për të sqaruar motivet dhe rrethanat e ngjarjes.
