Susie Wiles, shefja e kabinetit të Trumpit, njofton se është shëruar plotësisht nga kanceri
Shefja e kabinetit të Shtëpisë së Bardhë, Susie Wiles, ka njoftuar të mërkurën se është shëruar plotësisht nga kanceri, disa muaj pasi u diagnostikua me kancer gjiri në fazë të hershme në muajin mars.
Lajmin e dha përmes një deklarate të shkurtër të publikuar më 16 shtator në platformën X, ku shkruante: “Pas një vizite mjekësore në Mayo Clinic këtë javë, rezultatet e patologjisë dolën të pastra. Jam e shëruar nga kanceri.”
Wiles, 69 vjeçe, falënderoi familjen, miqtë dhe mjekët, si dhe “të gjithë ata që u lutën për mua, u interesuan dhe më mbështetën”. Një falënderim të veçantë i shprehu presidentit Donald Trump për “mbështetjen e palëkundur”, duke shtuar se do të vazhdojë punën për të avancuar agjendën “America First”.
Ajo është ndihmësja më e afërt e Trumpit gjatë mandatit të tij të dytë. Punoi në fushatat e tij që nga viti 2015, ishte bashkëdrejtuese e fushatës së vitit 2024 dhe u promovua më pas në shefe kabineti – gruaja e parë në histori që mban këtë post.
Para se t’i bashkohej ekipit të Trumpit, Wiles punoi si planifikuese në fushatën e Ronald Reaganit në vitin 1980, shërbeu nën James Baker dhe zëvendëspresidentin Dan Quayle, si dhe drejtoi fushatën e Ron DeSantis për guvernator të Floridës në vitin 2018.
Kur u diagnostikua në mars, Wiles përmendi statistikat e Shoqërisë Amerikane të Kancerit, sipas të cilave “gati një në tetë gra në SHBA” do të përballen me një diagnozë të ngjashme. Pavarësisht trajtimit, ajo vijoi të përmbushë detyrat e saj si shefe kabineti.
Burimi: USA Today
