Takimi “Miqtë e Ballkanit Perëndimor” në Bratislavë, Hoxha: E ardhmja e rajonit është në BE
Ministri për Evropën dhe Punët e Jashtme, Ferit Hoxha, mori pjesë në Takimin e Nivelit të Lartë të Grupit të “Miqve të Ballkanit Perëndimor”, të mbajtur në Bratislava, ku u diskutua mbi të ardhmen evropiane të rajonit dhe sfidat gjeopolitike me të cilat përballet Evropa.
Në një postim në rrjetin social X, Hoxha theksoi se gjatë takimit u rikonfirmua një mirëkuptim i përbashkët se integrimi i Ballkani Perëndimor në Bashkimi Evropian nuk përbën më vetëm një aspiratë afatgjatë politike, por një domosdoshmëri gjeostrategjike për një Evropë më të fortë, më të sigurt dhe më të bashkuar.
“Takimi i Nivelit të Lartë të Grupit të “Miqve të Ballkanit Perëndimor” rikonfirmoi një mirëkuptim të qartë dhe të përbashkët: integrimi i Ballkanit Perëndimor në Bashkimin Evropian nuk është më thjesht një aspiratë afatgjatë, por një domosdoshmëri gjeostrategjike për një Evropë më të fortë, më të sigurt dhe më të bashkuar.
Për Shqipërinë, objektivi kombëtar i anëtarësimit në BE brenda kësaj dekade nuk është thjesht një dëshirë, aq më pak një objektiv i zakonshëm politik apo një slogan. Ai është një objektiv kombëtar, një afat konkret pune dhe misioni ynë kryesor strategjik”, shkruan Hoxha.
Hoxha nënvizoi se për Shqipërinë, anëtarësimi në BE brenda kësaj dekade mbetet objektiv kombëtar dhe mision strategjik, duke shtuar se vendi është i angazhuar të vijojë reformat. Sipas Hoxhës, Shqipëria po e fiton anëtarësimin në Bashkimin Evropian përmes reformave konkrete dhe me një qasje të qartë, duke vepruar që tani si një shtet i ardhshëm anëtar.
“Nënvizova angazhimin e palëkundur të Shqipërisë për të çuar përpara reformat, për të forcuar institucionet demokratike dhe shtetin e së drejtës, për t’u harmonizuar plotësisht me Politikën e Përbashkët të Jashtme dhe të Sigurisë të BE-së, si dhe për të kontribuar aktivisht në stabilitetin rajonal dhe sigurinë evropiane. Shqipëria po e fiton anëtarësimin në BE përmes reformave dhe me një qasje të qartë, duke vepruar që tani si një shtet i ardhshëm anëtar”, shkruan ministri.
Në një kontekst gjithnjë e më sfidues gjeopolitik, Hoxha theksoi se zgjerimi duhet të mbetet i besueshëm, i bazuar në meritë dhe i mbështetur në rezultate konkrete për qytetarët. Në përfundim, Hoxha theksoi se e ardhmja e Ballkanit Perëndimor është në Bashkimin Evropian dhe se koha për të avancuar së bashku me vendosmëri dhe bindje është tani.
“Diskutimet tona u përqendruan te integrimi gradual, bashkëpunimi rajonal dhe siguria si çështje kyçe dhe urgjente në zemër të procesit të zgjerimit. Në një mjedis gjeopolitik gjithnjë e më sfidues, zgjerimi duhet të mbetet i besueshëm, i bazuar në meritë, i parashikueshëm dhe i mbështetur në rezultate konkrete për qytetarët tanë.
Ndërsa diferencimi mbi bazën e meritës është legjitim, me mirëkuptimin se vendet që ecin më shpejt me reformat meritojnë të avancojnë më shpejt drejt anëtarësimit, është e rëndësishme të sigurohet që asnjë vend i rajonit të mos ndihet i lënë pas dore apo i shkëputur strategjikisht nga procesi evropian. Shpreha mirënjohjen tonë ndaj Ministrit Juraj Blanar dhe të gjithë “Miqve të Ballkanit Perëndimor” për mbajtjen e zgjerimit në krye të agjendës së BE-së, si dhe i inkurajova të angazhohen në komunikim strategjik. Në një kohë kur Evropa përballet me sfida komplekse të sigurisë, ekonomisë dhe gjeopolitikës, përfundimi i bashkimit të Evropës nuk është vetëm në interes të Ballkanit Perëndimor, por edhe në interesin strategjik të vetë BE-së. Vendet që janë anëtarësuar më parë në BE kanë një histori për të treguar: është një histori suksesi, zhvillimi, paqeje dhe mirëqenieje. Të gjithë bien dakord se e ardhmja e Ballkanit Perëndimor është në Bashkimin Evropian. Por koha për të ecur përpara së bashku, me vendosmëri dhe bindje, është tani. Këtë po bën Shqipëria, me qëllim, qartësi dhe bindje”, përfundon ai.
