Teuta mposht Vorën 2-0 në “Niko Dovana” dhe ngjitet në krye të Superiores
Teuta arriti fitoren e tretë radhazi në Abissnet Superiore, duke mposhtur Vorën 2-0 në stadiumin “Niko Dovana”. Ndeshja ndryshoi drejtim në fundin e pjesës së parë, kur një krosim i Muço Boçit përfundoi në rrjetë nga sulmuesi nigerian Umejiego.
Siç raporton telesport, rezultati u vulos në kohën shtesë të ndeshjes, kur Pedro shënoi nga pika e bardhë e penalltisë pas një prekjeje me dorë brenda zonës.
Në minutat e fundit pati një ndërprerje të shkurtër të energjisë në “Niko Dovana”, siç kishte ndodhur edhe dy javë më parë në përballjen me Tiranën, por ndeshja u rikthye dhe përfundoi 2-0 për durrsakët.
Me këtë fitore Teuta ngritet në krye të renditjes me 10 pikë pas katër javësh, ndërsa Vora mbetet e shtata me 3 pikë, sipas të dhënave të publikuara nga telesport.
