Tornado e fuqishme në Oklahoma shkatërron shtëpi dhe biznese, mbyllet baza ajrore Vance

Një tornado e fuqishme goditi shtetin e Oklahomës, duke shkaktuar dëme të mëdha veçanërisht në qytetin Enid dhe rrethinë, pranë Bazës Ajrore Vance, sipas autoriteteve lokale.

Sipas Shërbimit Kombëtar të Motit, tornadoja kaloi nëpër Enid, një qytet me rreth 50,000 banorë në veri të shtetit. Pamjet treguan një kolonë ajri që rrotullohej shpejt dhe goditi tokën, duke shkaktuar shkatërrim të shtëpive dhe ndërtesave.

Autoritetet raportuan se nuk ka viktima, ndërsa disa persona pësoën lëndime të lehta. Policia dhe ekipet e emergjencës u mobilizuan menjëherë për të kërkuar dhe ndihmuar personat në zona të prekura, duke bashkëpunuar me zjarrfikësit dhe patrullat rrugore.

Kryetari i bashkisë së Enid, David Mason, njoftoi se disa banorë mbetën të bllokuar në shtëpitë e tyre për shkak të rrënojave dhe u desh ndërhyrja për t’i shpëtuar. Zona më e goditur ishte lagjia Gray Ridge, ku disa shtëpi u shkatërruan plotësisht.

Mason falënderoi komunitetin për mbështetjen e ofruar dhe për bashkëpunimin e bizneseve dhe banorëve ndaj të prekurve.

Edhe në Bazën Ajrore Vance janë shkaktuar dëme, përfshirë dëmtime të gardheve dhe pajisjeve, dhe baza është mbyllur përkohësisht për shkak të ndërprerjeve në furnizimin me energji elektrike dhe ujë.

Guvernatori i Oklahomës, Kevin Stitt, bëri thirrje për solidaritet me banorët e Enid dhe mbështetje ndaj komunitetit të prekur.

Shërbimi Kombëtar i Motit paralajmëroi për mundësi stuhish të tjera në rajon gjatë ditëve në vijim, duke përfshirë fundjavën.

Stuhitë e forta janë raportuar edhe në shtete të tjera, përfshirë Missouri, ku janë shënuar dëme në zonën e Kearney, por pa persona të lënduar. Ekipet vijojnë pastrimin dhe rikuperimin në zonat e prekura.