Trump i kërkon Gjykatës së Lartë të lejojë ndërtimin e murit kufitar në parkun Big Bend
Administrata e presidentit Donald Trump i kërkoi të mërkurën Gjykatës së Lartë të SHBA-së ta lejojë të vazhdojë me planin për ndërtimin e një barriere në kufirin SHBA–Meksikë në një zonë të largët të Teksasit perëndimor, që përfshin edhe parkun kombëtar Big Bend, siç njofton Reuters.
Departamenti i Drejtësisë paraqiti një kërkesë urgjente, me të cilën i kërkon gjykatës të heqë urdhrin e një gjyqtareje federale që ndaloi ndërtimin e murit në zonë, ndërkohë që vazhdon procesi gjyqësor i nisur nga një grup mjedisor dhe paditës të tjerë. Trump e ka promovuar prej kohësh ndërtimin dhe përforcimin e barrierave përgjatë kufirit me Meksikën si pjesë qendrore të politikave të tij kundër emigracionit të paligjshëm.
Sipas Reuters, përpjekja e administratës për ta shtrirë infrastrukturën kufitare brenda parkut kombëtar, rreth 400 kilometra në juglindje të El Pasos, është përballur me kundërshtimin e zyrtarëve vendorë, të ambientalistëve dhe edhe të disa republikanëve të Teksasit. Padinë e kanë ngritur Qendra për Diversitetin Biologjik, një guidë lumore e zonës së Big Bend dhe një grup që kërkon ruajtjen e një kishe historike në Ruidosa të Teksasit, e cila thotë se ndërtimi kërcënon strukturën e saj të brishtë prej qerpiçi.
Paditësit kundërshtojnë një sërë përjashtimesh (waivers) të lëshuara nga Departamenti i Sigurisë Kombëtare për të përshpejtuar ndërtimin e rrugëve dhe barrierave në rajonin e Big Bend, duke anashkaluar ligjet mjedisore dhe të ruajtjes së natyrës. Ish-sekretarja Kristi Noem dhe sekretari aktual Markwayne Mullin, që i lëshuan përjashtimet midis shkurtit dhe korrikut, e kishin shpallur zonën “zonë me hyrje të paligjshme të lartë”, që kërkon barriera shtesë për kontrollin e kufirit.
Gjyqtarja e qarkut Kathleen Cardone në El Paso lëshoi më 2 tetor një urdhër ndalimi për punimet dhe, në opinionin e saj të mëvonshëm, vlerësoi se përjashtimet e kishin tejkaluar autoritetin e Noem-it dhe Mullin-it. Departamenti i Drejtësisë i kërkoi Gjykatës së Lartë ta pezullojë ose ta rrëzojë urdhrin e Cardone-s, duke argumentuar se Kongresi e ka autorizuar qartë sekretarin si të ndërtojë barriera kufitare, ashtu edhe të heqë kërkesat ligjore për ta lehtësuar ndërtimin e shpejtë të tyre. Në gusht, administrata i kishte pezulluar vetë punimet në Big Bend, pasi projekti nxiti kritika dypartiake për ndikimin e mundshëm në peizazhin dhe faunën e parkut; ekipet kishin nisur pastrimin e terrenit në park, çka shkaktoi protesta dhe padi për ndalimin e punimeve.
