Trump: Përçarja në Iran pengon një përgjigje të unifikuar ndaj propozimit të armëpushimit
Presidenti amerikan Donald Trump ka komentuar situatën politike në Iran duke e cilësuar atë si një përçarje të brendshme, e cila sipas tij, po pengon vendin që të përgjigjet ndaj propozimit të fundit për një marrëveshje armëpushimi mes SHBA-së dhe Iranit.
Trump shkruan në Truth Social se Irani ka vështirësi në identifikimin e udhëheqësit të tij dhe se brenda vendit ekzistojnë përçarje të thella.
Udhëheqësi i ri suprem i Iranit, Mojtaba Khamenei, nuk është parë publikisht qëkur u emërua, ndërkohë që ka raporte se ai është plagosur rëndë në sulmin në të cilin u vra babai i tij. Në Teheran, vendimet e rëndësishme thuhet se po merren nga Korpusi i Gardës Revolucionare Islamike (IRGC), ndërsa kryetari i parlamentit Mohammad Bagher Ghalibaf dhe ministri i Jashtëm Abbas Araghchi, të cilëve u është ngarkuar të negociojnë me SHBA-në, konsiderohen më të gatshëm për një marrëveshje.
Trump thekson se përçarjet janë mes linjës së ashpër, e cila po humb terren në konflikt, dhe moderatëve që po fitojnë ndikim, duke e cilësuar situatën si shumë komplekse.
Ai njoftoi gjithashtu se kontrolli amerikan mbi Ngushticën e Hormuzit është i plotë dhe se asnjë anije nuk mund të kalojë pa miratimin e Marinës së SHBA-së. Deri në arritjen e një marrëveshjeje me Iranin, ky rajon do të mbetet i izoluari.
Shtëpia e Bardhë ka shpjeguar se ndarjet e brendshme në Iran kanë penguar vendin të japë një përgjigje të unifikuar ndaj propozimit amerikan për një armëpushim të përhershëm, gjë që ka çuar në zgjatjen e armëpushimit për një periudhë të pacaktuar.
