Vedat Muriqi ka qenë protagonist i një prej mbrëmjeve më të mëdha evropiane, duke shënuar golin e fitores për Fenerbahçen ndaj Liverpoolit, në triumfin dramatik 3:2. Ndërkohë, Real Madridi fitoi me të njëjtin rezultat ndaj AEK-ut, me një gol spektakolar të Federico Valverdes në minutën e 92-të.

Sulmuesi i Kombëtares së Kosovës, Vedat Muriqi, ka shkëlqyer në mbrëmjen evropiane, duke u shndërruar në heroin e Fenerbahçes në përballjen ndaj Liverpoolit.

Muriqi e nisi ndeshjen nga banka rezervë, por u inkuadrua në minutën e 62-të, në vend të Romelu Lukakut, për të vendosur më pas fatin e takimit.

Liverpooli kaloi i pari në epërsi në minutën e 24-t me Nyonin, ndërsa Greenwood barazoi shifrat katër minuta më vonë.

Në pjesën e dytë, Isak riktheu epërsinë e skuadrës angleze në minutën e 68-të, por Fenerbahçe reagoi shpejt dhe Archie Brown barazoi në 2:2 në minutën e 72-të.

Momenti vendimtar erdhi në minutën e 78-të, kur Vedat Muriqi realizoi për 3:2, pas një goditjeje të fuqishme. Goli u konfirmua edhe nga VAR-i, duke ndezur festën në stadiumin e Fenerbahçes.

Kështu, sulmuesi kosovar vulosi një fitore të madhe për skuadrën turke ndaj gjigantit anglez.

Ndërkohë, dramë pati edhe në Athinë, ku Real Madridi mposhti AEK-un me rezultat 3:2.

Skuadra greke kaloi në epërsi në minutën e 12-të me Koitën, por Jude Bellingham barazoi në minutën e 32-të.

AEK-u kaloi sërish në epërsi në minutën e 75-të përmes Pilos, por Kylian Mbappe barazoi vetëm tri minuta më vonë.

Kur ndeshja po shkonte drejt barazimit, Federico Valverde shënoi një gol spektakolar nga distanca në minutën e 92-të, duke ia siguruar Real Madridit tri pikët në një përfundim dramatik.