Zbardhen detaje nga gjyqi i nënës që vrau 3 fëmijët e saj të mitur në Massachusetts, flet infermierja e saj psikiatrike
Një infermiere psikiatrike që trajtoi Lindsay Clancy-n , një nënë e akuzuar për vrasjen e 3 fëmijëve të saj, në fund të vitit 2022, dëshmoi të martën se pacientja 36 vjeçare nga Massachusetts kërkonte vazhdimisht ndryshimin e ilaçeve të saj, pavarësisht shqetësimeve për respektimin e planit të trajtimit.
Rebecca Jollotta, një infermiere psikiatrike në programin e shëndetit të sjelljes perinatale të South Shore Hospital, krijoi një plan për trajtimin e ankthit, depresionit dhe pagjumësisë së Clancy-t nga fundi i nëntorit deri në fillim të dhjetorit 2022. Pothuajse çdo ditë, Clancy kërkonte ndryshime në plan, duke thënë se ilaçet po i shkaktonin mendime ndërhyrëse, pagjumësi dhe mpirje, dëshmoi Jollotta.
“Është thjesht një periudhë shumë e frikshme dhe stresuese për mua, dhe fillimi i ilaçeve të reja me efekte anësore është shumë i frikshëm për mua”, ka shkruar pacientja në një nga shënimet e saj.
Jollotta u përgjigj se i kuptonte shqetësimet e saj, por e këshilloi se ilaçit i duhen disa javë për të dhënë efekt. Ajo i tha Clancy-t se besonte se problemet e saj kishin më shumë gjasa të ishin depresion pas lindjes, sesa efekte anësore nga ilaçet.
“E gjithë kjo tingëllon si depresion pas lindjes”, shkroi Jollotta.
Dëshmia e Jollotta-s vjen në javën e tretë të gjyqit të Clancy-t, lidhur me 3 akuza për vrasje ndaj fëmijëve të saj Cora, 5 vjeçe; Daëson, 3 vjeç; dhe Callan, 8 muajsh. Jollotta është një prej disa profesionistëve mjekësorë psikiatrikë që kanë dëshmuar këtë javë për përpjekjet e tyre për të trajtuar problemet e shëndetit mendor të Clancy-t.
Prokurorët kanë argumentuar se Clancy “veproi qëllimisht, në mënyrë racionale dhe me shpejtësi” kur mbyti për vdekje tre fëmijët e saj dhe tentoi të vetëvritej në shtëpinë e saj në Duxbury më 24 janar 2023. Në veçanti, prokurorët argumentuan se Clancy “zgjodhi t’i trajtonte problemet e saj të shëndetit mendor në mënyrën më të keqe”, duke thënë se ajo manipuloi ofruesit e saj të kujdesit, kërkoi “zgjidhjen e shpejtë dhe të lehtë” dhe ndryshoi vazhdimisht planet e trajtimit.
Ndërkaq, avokatët e saj mbrojtës kanë thënë se Clancy nuk është penalisht përgjegjëse, sepse ajo ishte në mes të një episodi psikotik që rridhte nga sëmundja mendore pas lindjes. Avokatët e saj kanë kritikuar kujdesin e saj psikiatrik dhe kanë vënë në pikëpyetje trajtimin e saj.
Familja, miqtë dhe profesionistët e shëndetit mendor të saj kanë deklaruar se Clancy nuk shfaqi asnjë shenjë psikoze para ose pas vrasjeve dhe nuk besonin se ajo përbënte rrezik për veten ose fëmijët e saj. Ata që e njihnin thanë njëzëri se ajo ishte një nënë e kujdesshme, shëndeti mendor i së cilës po përkeqësohej.
Dëshmitë në gjyq nisën dy javë më parë me deklaratat hyrëse dhe dëshminë e bashkëshortit të saj.
Gjyqi pritet të zgjasë gjashtë deri në tetë javë. Clancy do të përballet me burgim të përjetshëm nëse do të shpallet fajtore për vrasje. Momentalisht, ajo po mbahet në spitalin publik Tewksbury në Massachusetts, i cili është i specializuar në trajtimin e personave me sëmundje mendore.
Në të njëjtën kohë, Clancy ka ngritur një padi civile kundër Tufts, Jollotta-s dhe ofruesve të tjerë të kujdesit shëndetësor, duke pretenduar neglizhencë mjekësore.
