Zbritje për udhëtarët e shpeshtë: Hapet regjistrimi për paketën “Breakaway” në urën Gordie Howe

Ndërsa pritja për hapjen e Gordie Howe International Bridge vazhdon, autoritetet kanë prezantuar një mundësi të re për udhëtarët e shpeshtë: një paketë zbritjeje që premton kalime më të shpejta dhe më ekonomike.
Autoriteti Windsor-Detroit Bridge Authority në bashkëpunim me Bridging North America njoftuan hapjen e regjistrimeve për planin personal “Breakaway”, i cili më parë ishte i disponueshëm vetëm për biznese.
Ky plan u jep mundësi drejtuesve të mjeteve të pajisen me një pajisje (tag) elektronike, duke mundësuar pagesa automatike të tarifës dhe kalim më të shpejtë në pikën kufitare.
Sipas tarifave të publikuara, kalimi standard për automjetet e pasagjerëve do të kushtojë 5.75 dollarë amerikanë (ose 8 dollarë kanadezë). Ndërsa përdoruesit e regjistruar në programin “Breakaway” përfitojnë një zbritje prej 25%, duke e ulur çmimin në 4.35 dollarë amerikanë (ose 6 dollarë kanadezë) për kalim.
Këto tarifa janë rreth gjysma e kostos së Ambassador Bridge, duke e bërë urën e re një alternativë më të përballueshme për udhëtarët mes Detroit dhe Windsor.
Autoritetet theksojnë se ky program është një hap i rëndësishëm në përgatitjet për hapjen e urës, e cila pritet këtë pranverë. Përveç kursimit financiar, sistemi “Breakaway” pritet të reduktojë ndjeshëm kohën e pritjes në kufi, pasi pagesat kryhen brenda sekondave dhe automjetet vazhdojnë pa ndalesa të gjata.
Ura e re do të ofrojë lidhje direkte me rrugë kryesore në të dyja anët e kufirit. Në anën kanadeze, ajo do të lidhet me Highway 401, E.C. Row Expressway dhe rrugë të tjera kryesore në rajonin Windsor-Essex. Ndërsa në anën amerikane, lidhjet përfshijnë I-75, I-94, I-96 dhe rrugë të rëndësishme të qytetit të Detroitit.
Zyrtarët bëjnë thirrje që qytetarët të regjistrohen paraprakisht në program përmes faqes zyrtare të urës, në mënyrë që të jenë gati për ditën e hapjes.
Me përparimin e testimeve dhe përgatitjeve teknike, autoritetet shprehen optimiste se ura do të jetë gati të mirëpresë kalimet e para shumë shpejt, duke sjellë një epokë të re në lëvizjen ndërkufitare mes Shteteve të Bashkuara dhe Kanadasë