Zbulohet skeleti i plotë i një kali lufte egjiptian i varrosur me nder rreth 3,000 vjet më parë
Arkeologët kanë gjetur skeletin e plotë të një kali që dyshohet të ketë shërbyer në shërbime ushtarake në Egjiptin e lashtë. Mbetjet u zbuluan brenda një kompleksi të gjerë arkeologjik që ka dhënë të dhëna të reja për jetën ushtarake dhe të përditshme brenda fortesave antike.
Sipas CBS News, gërmimet në vendin arkeologjik Tell Al‑Abqain në deltën e Nilit, në provincën veriore Beheira, nxorrën në dritë mbetje të vendosura brenda strukturave dhe sendeve që tregojnë funksionin ushtarak të këtij vendi. Vendi, sipas Ministrisë së Turizmit dhe Antikiteteve, besohet se u themelua gjatë periudhës së Mbretërisë së Re (1570–1069 p.e.s.) për të mbrojtur Egjiptin nga sulmet e fiseve libiane.
Ekskavacionet zbuluan një kompleks banimi prej tullash balte me rrugë të planifikuara, dhoma me silo për ruajtje drithi dhe furra qeramike cilindrike të përdorura për përgatitjen e ushqimit. Dr. Hisham El‑Leithy, sekretar i përgjithshëm i Këshillit të Lartë të Antikiteteve, tha se këto gjetje reflektojnë një plan urban të saktë dhe një sistem të organizuar për menaxhimin e burimeve brenda fortesës.
Ndër zbulimet më të rëndësishme ishte varrimi i plotë i një kali mashkull të ri. Mohamed Abdel‑Badie, drejtues i Sektorit të Antikiteteve egjiptiane, shpjegoi se studimet paraprake tregojnë se kali i përkiste një racë mesatare të shpejtë dhe të zhdërvjellët, prandaj besohet se është përdorur për aktivitetet ushtarake, përfshirë tërheqjen e karrocave luftarake. Pozicioni i trupit dhe i kokës, si dhe mënyra e rregullt e varrimit, sugjerojnë se kafsha u vendos qëllimisht për të marrë një varrim nderi.
Vetëm pak metra nga varrimi u gjetën copa cilindrike prej alabastrash dhe guri gëlqeror që mendohet të kenë qenë pjesë e rripit të karrocës, duke forcuar interpretimin e funksionit ushtarak të vendit. Gjithashtu u dokumentua një stelë gëlqerore që paraqet një të burgosur me trup të përkulur dhe duar të lidhura — veshja e tij sugjeron se bëhet fjalë për një të burgosur libian — si dhe amuleta fetare për mbrojtje, pjellori dhe ripërtëritje, qeramika të ndryshme, ostraka për ruajtje dhe përgatitje ushqimesh, mjete pune dhe bizhuteri.
Zbulimi i skeletit të plotë të kalit dhe i objekteve shoqëruese pasuron njohuritë mbi aspektet ushtarake dhe rituale në fortesat e Mbretërisë së Re dhe do të ndihmojë studiuesit të kuptojnë më mirë organizimin dhe funksionin e këtyre vendbanimeve antike. Siç raporton CBS News, këto gjetje kanë rëndësi për interpretimin e rolit të kafshëve dhe strukturës së vendbanimeve ushtarake të periudhës.
