Zvërneci/ Mbahet protesta e 13, marshim drejt Kryeministrisë dhe 5 kërkesa politike

Protesta qytetare kundër projektit për ndërtimin e një resorti luksoz në zonën e Zvërnecit në Vlorë ka hyrë në ditën e saj të 13 radhazi. Përmes një mobilizimi të vazhdueshëm, protestuesit janë mbledhur sërish në kryeqytet për të shprehur qëndrimin e tyre të prerë kundër këtij investimi të planifikuar dhe për të kërkuar ndryshime rrënjësore politike e ligjore.

Aktiviteti ka nisur fillimisht me grumbullimin e qytetarëve në sheshin “Skënderbej”, nga ku nisi një marshim përgjatë bulevardit “Dëshmorët e Kombit”. Me pankarta në duar, flamuj dhe thirrje kundër qeverisë e klasës politike në tërësi, demonstruesit u ndalën përpara godinës së Kryeministrisë.

Sipas protestuesve, janë pesë kërkesa kryesore të cilat ata i konsiderojnë si plotësisht të panegociueshme:

Dorëheqja e menjëhershme e Kryeministrit Edi Rama.

Krijimi i një Qeverie Teknike.

Shfuqizimi i Ligjit për Zonat e Mbrojtura.

Shfuqizimi i Ligjit për Investimet Strategjike.

Anulimi i plotë i projektit të njohur si “Paketa e Maleve”.