876 kilogramë duhan dhe 118 mijë cigare të dyshuara për kontrabandë konfiskohen në Prizren
Sektori Anti-Kontrabandë i Doganës së Kosovës ka konfiskuar 876 kilogramë duhan dhe 118 mijë cigare të dyshuara për kontrabandë gjatë një aksioni të zhvilluar në disa hapësira depoje në Prizren, siç njofton Telegrafi.
Sipas njoftimit të Doganës, aksioni u ndërmor bazuar në informacione të siguruara nga terreni. Gjatë kontrollit, sipas Klan Kosovës, u gjetën 791 kilogramë duhan i grirë i paketuar dhe 85 kilogramë duhan i grirë i papaketuar.
Po ashtu u sekuestruan 21 mijë cigare të markës “Marble” pa banderolë dhe 97 mijë cigare me banderolë të Bosnjës dhe Hercegovinës, por pa banderolën e Republikës së Kosovës.
Personi përgjegjës për hapësirat ku u gjet malli u arrestua dhe, me urdhër të prokurorit, u dërgua në mbajtje. Mallrat e konfiskuara janë dërguar për ruajtje nën mbikëqyrje doganore, ndërsa rasti po hetohet në bashkëpunim me Prokurorinë kompetente, raporton Telegrafi.
