E martë, 17 Nëntor 2026
54°F Detroit
Ballina›Futbolli ne Kosove›90 minuta larg objektivit, Kosova luan sonte për pozitën e dytë të grupit ndaj Irlandës

90 minuta larg objektivit, Kosova luan sonte për pozitën e dytë të grupit ndaj Irlandës

Kosova luan sonte në Dublin ndaj Irlandës në një ndeshje vendimtare për fatin e Grupit B3, siç njofton Telegrafi. Dardanët janë vetëm 90 minuta larg objektivit të tyre: ta ruajnë pozitën e dytë në grup dhe të sigurojnë pjesëmarrjen në play-off për promovim në Ligën A.

Skuadrës së Franco Fodës i mjafton edhe barazimi për ta arritur këtë synim. Kosova ka gjashtë pikë, një më shumë se Irlanda e vendit të tretë, e cila ka pesë pikë, ndaj me një barazim Dardanët mbeten para irlandezëve dhe sigurojnë vendin e dytë, pavarësisht rezultateve të tjera. Irlandës, nga ana tjetër, i kryen punë vetëm fitorja për ta kaluar Kosovën në renditje dhe për ta marrë pozitën e dytë.

Optimizëm për këtë sfidë e jep edhe përballja e parë mes dy skuadrave. Në shtator, në stadiumin “Fadil Vokrri”, Kosova triumfoi 1-0, me golin e fitores të shënuar nga Vedat Muriqi në minutën e 83-të. Dardanët vijnë në Dublin pas barazimit pa gola ndaj Izraelit, në një ndeshje ku krijuan raste, por nuk gjetën rrugën e rrjetës.

Megjithatë, përzgjedhësi Foda nuk do t’i ketë në dispozicion të gjithë lojtarët për këtë sfidë. Ndaj Irlandës mungojnë Edon Zhegrova, për shkak të lëndimit, dhe Veldin Hoxha, i suspenduar pas kartonit të kuq në ndeshjen e fundit. Irlanda, e udhëhequr nga përzgjedhësi Heimir Hallgrimsson, vjen pas humbjes 1-0 nga Austria, rezultat që ia mbylli garën për vendin e parë dhe promovimin direkt në Ligën A.

Lini një koment