Tragjedi në Athinë! Shuhen në aksident tre të rinj nga Fieri, dy të tjerë në gjendje të rëndë

Një aksident tragjik i ndodhur në orët e para të mëngjesit të sotëm në Glyfada të Athinës i ka marrë jetën tre të rinjve shqiptarë me origjinë nga Fieri, ndërsa dy të tjerë kanë mbetur të plagosur rëndë.

Ngjarja e rëndë u shënua rreth orës 02:00 në bulevardin “Poseidonos”, në kryqëzimin me rrugën “Kalypsous”, kur automjeti me të cilin udhëtonin pesë të rinjtë doli nga rruga dhe u përplas me forcë me një mur betoni pranë një hoteli. Përplasja shkaktoi shkatërrimin e plotë të mjetit, duke kërkuar ndërhyrjen e tetë efektivëve të zjarrfikëses për nxjerrjen e trupave nga rrënojat.

Sipas të dhënave zyrtare nga autoritetet greke dhe raportimeve lokale:

Viktimat: Tre prej pasagjerëve nuk u mbijetuan dot plagëve, mes të cilëve një 23-vjeçar, një 26-vjeçar dhe një person i tretë, identiteti i të cilit ende nuk është bërë me dije.

Të plagosurit: Dy të mbijetuarit janë të dy të moshës 18-vjeçare. Njëri prej tyre ndodhet në gjendje kritike për jetën dhe është i intubuar, ndërsa tjetri po merr trajtim intensiv për dëmtime të shumta.

Policia Rrugore greke ka nisur hetimet për zbardhjen e plotë të rrethanave të ngjarjes dhe po sekuestron pamjet e kamerave të sigurisë në zonë. Nga verifikimet e deritanishme nuk rezulton të jetë përfshirë ndonjë automjet tjetër në aksident.