Francë, rrjeti rus tentoi manipulimin me pamjet e protestave, grupet online e paraqitën si shtet i dobët me qeveri autoritare
Siç njofton Shqiptarja.com, një rrjet i fshehtë i lidhur me Rusinë u përpoq të shfrytëzonte përmes rrjeteve sociale trazirat e muajit të kaluar në Francë, duke fajësuar emigracionin e pakontrolluar dhe duke paraqitur qeverinë si të paaftë për të mbajtur kontrollin. Protestat vazhduan edhe këtë fundjavë, ndërsa 360 persona u arrestuan.
Sipas një analize të fundit të VIGINUM, agjencisë franceze për vigjilencë dhe mbrojtje nga ndërhyrjet e huaja digjitale, rrjeti i lidhur me Rusinë shpërndau imazhe dhe video të edituara nga protestat e fundit në Paris dhe në qytete të tjera franceze.
Ekipi i vëzhgimit dhe analizës i VIGINUM konstatoi se mbi 100 grupe të lidhura me Rusinë ndanë pothuajse 4.000 përmbajtje në Telegram, TikTok dhe X, duke e përshkruar Francën si një “shtet i dobët me qeveri autoritare”. Përmbajtja, e shpërndarë nga 10 shtatori deri më 20 tetor, arriti mbi 20 milionë shikime, me mesazhe si “nuk ka më një qeveri legjitime” dhe “Franca është e pambrojtur dhe po shkatërrohet nga brenda”.
Grupet pretendonin se ishin të pavarura, por janë të lidhura me operacione të koordinuara nga Moska, duke përdorur llogari të rreme dhe përmbajtje të manipuluara, përfshirë video të vjetra protestash të paraqitura si ngjarje të fundit.
Rreth 60% e përmbajtjes sulmonte qeverinë franceze dhe presidentin Emmanuel Macron, ndërsa pjesa tjetër shpërndante mesazhe kundër emigracionit. Një zyrtar i VIGINUM, i cili foli në kushte anonimiteti, tha se synimi është të krijohet pasiguri dhe të minohet besimi te institucionet demokratike.
