Të shtëna në kampusin e Universitetit Winston-Salem, vritet 19-vjeçari, arrestohet 20-vjeçari
Siç njofton Shqiptarja.com, një 19-vjeçar u vra dhe të paktën tre persona të tjerë u plagosën nga të shtënat me armë zjarri të shtunën në mbrëmje, rreth orës 19:05 me orën lokale, në kampusin e Universitetit Shtetëror Winston-Salem në Karolinën e Veriut. Incidenti ndodhi gjatë një feste në natyrë, ku ishin mbledhur shumë njerëz dhe po zhvilloheshin aktivitete studentore, me sa duket të lidhura me kthimin e të diplomuarve në universitet.
Sipas dëshmitarëve, të shtënat nisën pasi shpërtheu një përplasje mes dy grupeve gjatë festës. Ende nuk dihet me siguri se kush qëlloi i pari. Viktima që humbi jetën është identifikuar si Trevon Jones, 19 vjeç.
Policia arrestoi Devin Antonio Young, 20 vjeç, në lidhje me vrasjen. Për të ishte lëshuar një urdhër arresti për vrasje dhe ai u dorëzua vullnetarisht në Departamentin e Policisë së Winston-Salemit të dielën, rreth mesnatës me orën lokale. Ai u burgos pa të drejtë lirimi me garanci.
Të paktën tre persona të tjerë u plagosën. Tre prej tyre, mes tyre edhe një vajzë, u dërguan në spital — njëri prej tyre i qëlluar në gjoks dhe në gjendje kritike — ndërsa një tjetër i plagosur u trajtua në vendngjarje.
Zëdhënësi i policisë, John Johnson, tha se autoritetet po hetojnë nëse incidenti kishte lidhje me universitetin apo ishte një konflikt mes të rinjve vendas në zonën e kampusit. Universiteti njoftoi se kampusi u mbyll dhe studentët u strehuan brenda ndërtesave, ndërsa u lejuan të dilnin më vonë vetëm pas lejes së policisë.
