Berisha: Bashkimi i opozitës mbi interesat partiake, jo numërimit elektronik

Kryetari i Partisë Demokratike, Sali Berisha, deklaroi në mbledhjen e grupit parlamentar se largimi i kryeministrit Edi Rama mbetet kushti kryesor për garantimin e zgjedhjeve të lira dhe të ndershme në Shqipëri.

Gjatë diskutimeve për paketën e opozitës mbi reformën zgjedhore, Berisha theksoi se Partia Demokratike do të vendosë interesin e bashkimit të opozitës mbi interesat e saj partiake, me qëllim ndërtimin e një fronti të gjerë kundër qeverisë.

Duke folur për procesin e reformës zgjedhore, Berisha akuzoi përfaqësuesin e mazhorancës në komision, Damian Gjiknurin, se ka tentuar të përcaktojë në mënyrë të njëanshme agjendën e punës së komisionit bipartizan.

Kryetari i Partisë Demokratike, Sali Berisha, u bëri thirrje të gjitha forcave opozitare të mbështesin propozimet e PD-së për reformën zgjedhore, duke theksuar se interesi i bashkimit të opozitës do të vendoset mbi interesat partiake.

Gjatë mbledhjes së grupit parlamentar, Berisha prezantoi disa nga propozimet kryesore të demokratëve, mes të cilave listat 100% të hapura në një zonë të vetme kombëtare, rikthimin e koalicioneve me lista të hapura, barazi të plotë mes pozitës dhe opozitës në vendimmarrjen e KQZ-së, si dhe votimin e detyrueshëm për qytetarët.

“Ne ftojmë të gjitha forcat politike opozitare të mbështesin votimin e detyrueshëm të qytetarëve. Vende demokratike si Australia dhe Belgjika kanë vendosur detyrimin e çdo qytetari për të votuar, duke përjashtuar mundësinë e blerjes së të drejtës së votës”, deklaroi Berisha.

Kreu i PD-së u shpreh kategorikisht kundër numërimit elektronik të votave, duke argumentuar se ky sistem ka shfaqur probleme në vende të ndryshme.

“Jemi kategorik kundër çdo forme numërimi elektronik. Asnjë numërim elektronik”, tha ai.

Sa i përket votës së diasporës, Berisha theksoi se opozita mbështet të drejtën e emigrantëve për të votuar, por kërkoi diskutime të mëtejshme për gjetjen e mekanizmave sa më të sigurt dhe transparentë për zbatimin e saj.

Në përfundim, Berisha përsëriti thirrjen për bashkimin e opozitës dhe qëndrimin e tij se ndryshimet në reformën zgjedhore duhet të shoqërohen me ndryshime politike në vend.

Ende nuk ka komente. Bëhuni i pari që komenton.