Berisha dënon grisjen e flamurit të Izraelit në ambasadë: Akt kriminal ekstremist dhe antisemit
Kryetari i Partisë Demokratike, Sali Berisha, ka reaguar përmes një postimi në rrjetet sociale lidhur me incidentin e ndodhur në ambientet e Ambasadës së Izraelit në Shqipëri, ku është grisur flamuri i Izraelit.
Berisha e cilësoi ngjarjen si një “akt kriminal ekstremist dhe antisemit”, duke e dënuar me forcë veprimin.
Ai theksoi se ky akt bie ndesh me ndjenjat e miqësisë dhe lidhjet tradicionale që bashkojnë popullin shqiptar me atë izraelit.
“Partia Demokratike dënon me forcën më të madhe grisjen e flamurit të Izraelit të ngritur në ambasadën e këtij vendi si një akt kriminal ekstremist, antisemit që bie ndesh me ndjenjat dhe lidhjet tradicionale që bashkojnë dy kombet dhe dy vendet tona dhe kërkon ndëshkimin e merituar ligjor të autorit”, shkruan Berisha.
