Bllokohet autostrada Tiranë-Durrës, ARRSH njofton oraret dhe devijimet e trafikut

Drejtuesit e mjeteve që qarkullojnë në autostradën Tiranë-Durrës duhet të tregojnë kujdes gjatë dy netëve të ardhshme, pasi do të ketë bllokime të përkohshme të qarkullimit në të dyja drejtimet.

Autoriteti Rrugor Shqiptar (ARRSH) ka njoftuar se masat janë të nevojshme për shkak të punimeve për montimin e trarëve tërthorë, në kuadër të projektit për zgjerimin e superstradës, Faza III.

Në drejtimin Tiranë-Durrës, qarkullimi do të bllokohet sonte, më 21 shtator, nga ora 23:00 deri në 05:00.

Gjatë kësaj periudhe, trafiku do të devijohet nëpërmjet rampës së Rinasit dhe më pas do të vijojë në rrugën dytësore, për t’u rikthyer në superstradë përmes rrugës së Rinasit dhe rampës në drejtim të Durrësit.

Për mjetet e rënda, devijimi do të nisë që nga rrethrrotullimi i “Casa Italia”, me qëllim shmangien e dëmtimit të rampës provizore të Rinasit.

Në drejtimin Durrës-Tiranë, bllokimi i qarkullimit do të kryhet nesër, më 22 shtator, nga ora 23:00 deri në 05:00.

Trafiku do të devijohet përmes mbikalimit Kashar-Thumanë dhe më pas do të vijojë në rrugën dytësore, në krahun e majtë, deri pas mbikalimit të Kasharit, ku automjetet do të rikthehen në autostradë në drejtim të Tiranës.

Ndërkohë, automjetet që kanë destinacion Rinasin, Shkodrën dhe Kosovën do të orientohen që në mbikalimin e autostradës Kashar-Thumanë.

ARRSH u bën thirrje drejtuesve të mjeteve të tregojnë kujdes dhe të ndjekin sinjalistikën dhe udhëzimet për devijimin e trafikut gjatë orareve të punimeve.