Dy shoqe të mitura raportohen të zhdukura në Gjilan, familjarët nuk dinë ku ndodhen

Dy vajza të mitura nga fshati Livoç i Epërm i komunës së Gjilanit janë raportuar të zhdukura nga familjarët e tyre, pasi kishin dalë së bashku dhe prej atëherë nuk dihet asgjë për vendndodhjen e tyre, siç njofton Lajmi.net, duke iu referuar raportit 24-orësh të Policisë së Kosovës.

Sipas raportit policor, rasti është raportuar nga familjarët më 16 tetor, rreth orës 23:50. “Nga familjarët e tyre janë raportuar të zhdukura dy shoqe, femra të mitura. Sipas familjarëve, këto të fundit kanë dalë bashkë dhe nuk dihet asgjë për vendndodhjen e tyre”, thuhet në raportin e Policisë së Kosovës.

Policia bën të ditur se rasti është nën hetime, ndërsa deri më tani nuk janë dhënë detaje të tjera për rrethanat e zhdukjes së dy të miturave.

Rastin e ka përfshirë në përmbledhjen e raportit 24-orësh të policisë për datën 17 tetor edhe Telegrafi, sipas të cilit gjatë 24 orëve të fundit në Kosovë janë arrestuar 14 persona për vepra të ndryshme penale.